काठमाडौं : नेपाली कांग्रेसका महामन्त्री गगन थापाले पूर्वराजा ज्ञानेन्द्र शाहमाथि कडा टिप्पणी गर्दै उनी हाल चलिरहेको राजावादी आन्दोलनका वास्तविक अगुवा भएको दाबी गरेका छन्। शनिबार आयोजित ‘गणतन्त्र नै सही बाटो’ विषयक संवाद कार्यक्रममा बोल्दै थापाले पूर्वराजालाई अब पर्दा पछाडिबाट हैन, खुला रुपमा अगाडि आउन चुनौती दिए।
“यदि ज्ञानेन्द्र शाह नै राजतन्त्र फर्काउने अभियानका लिडर हुन् भने अब यसरी चुपचाप बोलेर हुँदैन, सिधा मैदानमा आउनुपर्छ,” उनले भने, “जनतालाई जवाफ दिनुपर्छ। अहिले देशले भोगिरहेको समस्याको समाधान के हो भनेर खुलस्त भन्नुपर्छ।”
थापाले केही महिनामा एकपटक मात्र वक्तव्य निकालेर जनतालाई भ्रममा पार्न खोज्नु गलत भएको बताए। “राजा हुँदा यस्तो सुविधा थियो होला, तर आन्दोलन गर्नेहरूलाई अब त्यो सुविधा छैन। सडकमा आएर कुरा गर्नु पर्यो,” उनले जोड दिए।
गणतन्त्रमा जनतासँग संवाद गर्नुपर्ने, जनताका प्रश्नको जवाफ दिनुपर्ने कुरामा जोड दिंदै थापाले भने, “गणतन्त्र पक्षधरले प्रतिस्पर्धा गर्नुपर्ने, प्रश्नको सामना गर्नुपर्ने अनि राजतन्त्र ल्याउनेहरूचाहिँ केही जवाफ नदिई उम्कन पाउने? जनताले प्रश्न गर्न नपाउने? सञ्चारमाध्यमले पनि प्रश्न गर्न नपाउने?”
उनले स्पष्ट पारे — लोकतन्त्रमा सबैले जवाफदेही हुनुपर्छ, चाहे त्यो नेता होस् वा पूर्वराजा।
