काठमाडौं : देशकी चर्चित तथा लोकप्रिय गायिका रचना रिमाललाई रुकुम पश्चिममा सांगीतिक प्रस्तुतिका लागि गएकी बेला आकस्मिक स्वास्थ्य समस्या आएपछि सेनाको हेलिकप्टरमार्फत उद्धार गरी काठमाडौं ल्याइएको छ।
रिमाल रुकुम पश्चिमको सानीभेरी गाउँपालिकास्थित बेलटापुमा सञ्चालन भइरहेको सांगीतिक महोत्सवमा आफ्नो प्रस्तुति दिन गएकी थिइन्। कार्यक्रममा प्रस्तुति दिनुअघि अचानक उनको पेटमा गम्भीर दुखाइ सुरु भएको बताइएको छ। स्वास्थ्य अवस्था जटिल बन्दै गएपछि आयोजक पक्ष र स्थानीय प्रशासनको समन्वयमा उनलाई तत्काल नेपाली सेनाको हेलिकप्टरमार्फत उद्धार गरेर नेपालगञ्ज लगिएको थियो।
सुर्खेतबाट मगाइएको सेनाको हेलिकप्टरले उनलाई नेपालगञ्जस्थित एक अस्पतालमा पुर्याएको थियो। नेपालगञ्जमा प्रारम्भिक उपचारपछि चिकित्सकको सल्लाहअनुसार मंगलबार बिहान उनलाई थप उपचारका लागि काठमाडौं ल्याइएको हो। काठमाडौं ल्याएपछि उनलाई तुरुन्तै अस्पताल भर्ना गरिएको स्रोतले जनाएको छ। हाल उनी चिकित्सकीय निगरानीमा रहेको र अवस्था स्थिर रहेको बताइएको छ।
रचना रिमाल हाल नेपाली सांगीतिक क्षेत्रमा अत्यन्तै ब्यस्त तथा मागमा रहेकी गायिका हुन्। ‘पाउजुको छमछमी’, ‘फूल बुट्टे सारी’, ‘शिरैमा शिरबन्दी’ जस्ता चर्चित गीतहरूबाट एकाएक दर्शक–श्रोता बीच लोकप्रिय बनेकी उनले छोटो समयमै उल्लेखनीय सफलता हासिल गरेकी छन्। उनी देशभर हुने साङ्गीतिक कार्यक्रम, कन्सर्ट तथा स्टेज शोहरूमा लगातार सक्रिय रहँदै आएकी छन्।
उनको स्वास्थ्य अवस्थाले शुभचिन्तक, प्रशंसक र साङ्गीतिक क्षेत्रका व्यक्तिहरूलाई चिन्तित बनाएको छ। सामाजिक सञ्जालमा उनका स्वास्थ्य लाभको कामना गर्दै शुभेच्छाहरू दिइएका छन्। आयोजकहरूले रिमालको कार्यक्रम स्थगित गरिएको जानकारी दिएका छन्।
गायिका रिमाललाई के कारणले पेटमा यस्तो समस्या देखिएको भन्ने विषयमा चिकित्सकले विस्तृत परीक्षणपछि मात्र खुलासा हुने बताएका छन्। हाल उनको स्वास्थ्यमा क्रमिक सुधार आइरहेको नजिकको स्रोतले जानकारी दिएको छ।
गायिका रिमालको चाँडो स्वास्थ्यलाभको कामना गर्दै सारा नेपाली साङ्गीतिक जगतले साथ दिइरहेको छ।
