काठमाडौं । सांगीतिक प्रस्तुतिको लागि रुकुम पश्चिम पुगेकी गायिका रचना रिमालको स्वास्थ्यमा समस्या देखिएपछि उनको अहिले ह्याम्स अस्पतालमा उपचार भैरहेको छ । सांगीतिक कार्यक्रमका लागि रूकुम पश्चिम पुगेकी उनको स्वास्थ्यमा अचानक समस्या देखिएपछि उनलाई मंगलबार दिउँसो हेलिकप्टरबाट काठमाडौं ल्याइएको थियो।
परीक्षण क्रममा उनको आन्द्रामा संक्रमण देखिएको छ। रचनासँगै अस्पतालमा रहेका संगीतकर्मीका अनुसार उनको सानो आन्द्रा सुन्निएको चिकित्सकले बताएका छन्। संक्रमण बढ्न नदिन चिकित्सले मंगलबार रातीदेखि औषधि चलाएका छन् । औषधि चलाइन्जेल डाक्टरले खाना र जुस पनि नखान सल्लाह दिएका छन् ।
‘अझै केही दिन अस्पतालमै उपचार गर्नुपर्ने देखिएको छ । खान खान सक्ने भएपछि मात्र डिस्चार्ज हुन सक्ने अनुमान गरिएको छ। २/३ दिन अस्पतालमै राख्नुपर्ने डाक्टरहरुले बताएका छन्। अहिले उनलाई इमरजेन्सीबाट वार्ड सार्ने तयारी छ।
रचनाले मंगलबार रूकुम पश्चिम सानिभेरीको बेलटापुमा सञ्चालन भइरहेको महोत्सवमा प्रस्तुति दिने तयारी थियो। तर मंगलबार बिहान अचानक पेट दुखेको बताएपछि सुर्खेतबाट नेपाली सेनाको हेलिकप्टर मगाएर उनलाई नेपालगञ्ज लगिएको थियो। त्यहाँबाट उनलाई काठमाडौं ल्याएर अस्पताल भर्ना गरिएको हो। रचना पछिल्लो पुस्ताकी लोकप्रिय गायिका हुन्।
