काठमाडौं । काठमाडौं महानगरपालिकाका मेयर बालेन्द्र साह (बालेन) विरुद्ध अख्तियार दुरुपयोग अनुसन्धान आयोगमा उजुरी परेको छ। युवराज सफल नाम गरेका व्यक्तिले महानगरको कार्यालयमा झण्डै एक करोड रुपैयाँको लिफ्ट बिना प्रतिस्पर्धा, बिना टेन्डर, र बिना कोटेसन जडान गरिएको भन्दै उजुरी दर्ता गरेका हुन्।
‘एक देशभक्त नागरिक’को परिचय दिएका सफलले सार्वजनिक खरिद ऐन २०६३ र सार्वजनिक खरिद नियमावली २०६४ विपरीत अपारदर्शी ढंगले लिफ्ट खरिद गरिएको आरोप लगाएका छन्। उजुरीमा भनिएको छ कि उक्त लिफ्ट विशेषतः मेयर बालेन्द्र साहकै सुविधाका लागि जडान गरिएको हो भन्ने जानकारी महानगरभित्रकै स्रोतले दिएको छ।
सफलले आफू लिफ्टको जडानप्रति होइन, त्यसमा अपनाइएको अनियमित र अपारदर्शी प्रक्रियाप्रति आपत्ति जनाएका छन्। उनले भनेका छन्, “सरकारी वा सार्वजनिक निकायले कुनै सामान वा सेवा खरिद गर्दा बोलपत्र प्रक्रिया अनिवार्य हुन्छ। तर यो प्रक्रियाको पूर्णतः अवहेलन गरिएको छ।”
उनले अख्तियारसँग उक्त लिफ्ट जडानसम्बन्धी सबै कागजात — टेन्डर आव्हान, निर्माण स्वीकृति, निर्माण कम्पनीको विवरण, भुक्तानी बिल, भौचर लगायत — झिकाएर छानबिन गर्न माग गरेका छन्। साथै उनले सो प्रकरणमा भएको भ्रष्टाचार र अनियमितताविरुद्ध सत्यतथ्य उजागर गरी कानूनी कारबाही गर्न माग गरेका छन्। उक्त उजुरीसँगै मेयर बालेन्द्र साहको कार्यशैलीमा पारदर्शिता र जवाफदेहिताको प्रश्न उठेको छ।
