काठमाडौं : भारतको गुजरात राज्यको अहमदाबादस्थित विमानस्थल नजिकै एक दर्दनाक विमान दुर्घटना भएको छ। बिहीबार दिउँसो एयर इन्डियाको लन्डन गन्तव्यतर्फ उडेको विमान केही समयमै दुर्घटनामा परेको हो।
इन्डिया टुडेले जनाए अनुसार, अहमदाबादको मेघानी क्षेत्र नजिक रहेको विमानस्थलबाट उडेपछि एयर इन्डियाको बोइङ ७८७–८ ड्रीमलाइनर विमान आकस्मिक रूपमा दुर्घटनामा परेको हो। उक्त विमानमा २४२ यात्रु सवार थिए।
दुर्घटनाबारे विस्तृत जानकारी आउन बाँकी भए पनि घटनास्थल नजिकैबाट खिचिएका दृश्यहरूमा गहिरो कालो धुवाँ आकासमा उडेको देखिएको छ। प्रत्यक्षदर्शीहरूका अनुसार, आकाशमा एकाएक ठूलो आवाजसहित धुवाँ देखिएपछि मानिसहरू आत्तिएका थिए।
दुर्घटनापछि तुरुन्तै उद्धार कार्य सुरु गरिएको छ। सात वटा दमकल सहित आपतकालीन सेवाहरू घटनास्थलमा पुगेका छन् र उद्धार तथा आगो निभाउने कार्य भइरहेको छ। विमान किन र कसरी दुर्घटना भयो भन्ने विषयमा अनुसन्धान जारी रहेको छ।
