काठमाडौं : गृहमन्त्री रमेश लेखकले संसदमा भइरहेको अवरोधलाई अनावश्यक र राजनीति प्रेरित भएको बताएका छन्। नेपाल शिक्षक संघद्वारा बिहीबार काठमाडौंमा आयोजित कार्यक्रममा बोल्दै मन्त्री लेखकले कर्मचारीबाट भएको सामान्य गल्तीलाई लिएर सरकारले नै दोषी हो भन्ने शैलीमा संसदमा बखेडा झिकिएको टिप्पणी गरे।
उनले विपक्षी दलहरूले भिजिट भिसा प्रकरणलाई अतिरञ्जित गर्दै, सरकार र मन्त्रीमाथि निहुँ खोजेर संसदलाई अबरुद्ध पारिरहेको आरोप लगाए। “यो अवरोध राजनीतिक पूर्वाग्रह र प्रतिशोधबाट प्रेरित छ,” उनले भने, “विपक्षीहरूले उठाएको विषयको न त कुनै अर्थ छ, न नै औचित्य।”
मन्त्री लेखकले संसद अवरोध चाँडै हट्ने विश्वास पनि व्यक्त गरे। उनले संसद सुचारु भएलगत्तै असार १५ भित्र विद्यालय शिक्षा विधेयक पारित गर्ने तयारी भएको जानकारी गराउँदै, शिक्षकहरूको माग पूरा गर्न सरकार प्रतिबद्ध रहेको स्पष्ट पारे।
