काठमाडौं : टिकटकमा सक्रिय रहेकी रमा बस्नेतलाई नेपाल प्रहरीले पक्राउ गरेको छ। भोटाहिटीस्थित प्रहरीको केन्द्रीय साइबर ब्युरोको टोलीले उनलाई भक्तपुरबाट आइतबार नियन्त्रणमा लिएको हो।
ब्युरोका अनुसार आरोपित बस्नेतले टिकटकमा नियमित र नियोजित रूपमा जातीय तथा साम्प्रदायिक भावना भड्काउने सामग्री पोस्ट गर्दै आएकी थिइन् । उनले विभिन्न प्रतिष्ठित व्यक्ति र संस्थालाई लक्षित गरी तथ्यहीन र आधारहीन विषय उठान गरेर समाजमा नकारात्मक धारणा फैलाउने र चरित्र हत्या गर्ने गरेको ब्युरोको आरोप छ ।
सामाजिक सञ्जालमा भ्रामक र द्वेषपूर्ण सामग्रीबारे उजुरी परेपछि ब्युरोले प्राविधिक विश्लेषण र अनुसन्धान अगाडि बढाएको थियो । अनुसन्धानका क्रममा बस्नेतको संलग्नता खुलेपछि ब्युरोबाट खटिएको प्रहरी टोलीले उनलाई भक्तपुरबाट नियन्त्रणमा लिएको हो ।
उनका टिकटक भिडियोहरूमा पूर्वप्रधानमन्त्री केपी शर्मा ओली, काठमाडौं महानगरपालिकाकी उपप्रमुख सुनिता डंगोलविरुद्ध आलोचना गरिएको छ भने रास्वपाका सभापति रवि लामिछाने र काठमाडौं महानगरका मेयर बालेन शाहको पक्षमा समर्थनजन्य सामग्री देखिन्छन्।
