काठमाडौं । त्रिदेशीय टी–२०आई शृंखलामा नेपालले आज स्कटल्याण्डको ग्लासग्लोस्थित टिटवुड मैदानमा आफ्नो पहिलो खेल नेदरल्याण्ड्सविरुद्ध खेल्दैछ। नेपाली समय अनुसार खेल बेलुका ७:४५ बजे सुरु हुनेछ। प्रत्यक्ष प्रसारण एक्सन स्पोर्ट्स, एडिआर स्पोर्ट्स च्यानल तथा युट्युबमार्फत हेर्न सकिनेछ।
यो खेल नेपालका लागि विशेष छ, किनभने यो टिम नेपालको १००औं टी–२० अन्तर्राष्ट्रिय खेल हुनेछ। शृंखलाको पहिलो खेलमा स्कटल्याण्डले नेदरल्याण्ड्सलाई ३९ रनले हराएको थियो। १६१ रनको लक्ष्य पछ्याउने क्रममा नेदरल्याण्ड्स १२१ रनमै समेटिएको थियो।
नेपाल र नेदरल्याण्ड्सबीचको प्रतिस्पर्धा ऐतिहासिक रूपमा रोमाञ्चक रहँदै आएको छ। अहिलेसम्म भएका १३ टी–२०आई खेलमध्ये नेदरल्याण्ड्सले ७ खेल जितेको छ भने नेपालले ५ खेलमा बाजी मारेको छ। १ खेल नतिजाविहीन भएको छ।
हालै सन् २०२४ को टी–२० विश्वकपमा पनि नेपाल र नेदरल्याण्ड्स आमनेसामने भएका थिए, जहाँ नेदरल्याण्ड्स विजयी भएको थियो। त्यसअघि मार्चमा कीर्तिपुरमा भएको त्रिदेशीय शृंखलाको फाइनलमा पनि नेपालले नेदरल्याण्ड्ससँग हार व्यहोरेको थियो, यद्यपि लिग चरणमा दुवै टिमले एक–एक जित हात पारेका थिए।
एकदिवसीय विश्वकप लिग–२ शृंखला सकिएपछि यी टोलीहरू पुनः टी–२० ढाँचामा भिड्न लागेका हुन्। आजको खेल नेपालका लागि न केवल रेकर्डको मौका हो, तर अघिल्ला पराजयको बदला लिने अवसर पनि हो।
