काठमाण्डौंः राष्ट्रिय स्वतन्त्र पार्टी (रास्वपा) का सांसद सुमना श्रेष्ठ विरुद्ध अख्तियार दुरुपयोग अनुसन्धान आयोगमा उजुरी परेको छ । श्रेष्ठ शिक्षा मन्त्री हुँदा व्यापक आर्थिक चलखेल गरी पूर्वाञ्चल विश्वविद्यालयमा उपकुलपति नियुक्त गरेको भन्दै उनीहरुविरुद्ध बिहीबार अख्तियार दुरुपयोग अनुसन्धान आयोगको केन्द्रीय कार्यालयमा उजुरी दर्ता भएको छ ।
२०८० वैशाख तेस्रो साता तत्कालीन शिक्षामन्त्री सुमनाले उपकुलपति नियुक्त सम्वन्धी विश्वविद्यालयको कार्यविधीलाई लत्याएर आर्थिक लाभ लिएर उपकुलपतिमा प्रा.डा. विजुकुमार थपलियालाई नियुक्त गरेकी थिईन । शिक्षा क्षेत्रमा व्यापक सुधारको पक्षमा वकालत गर्ने रास्वपाकी सांसद श्रेष्ठ विरुद्ध उजुरी परेसँगै अख्तियारले छानविन अघि बढाउने जनाएको छ ।
उक्त विश्वविद्यालयको रिक्त उपकुलपति पदका लागि विज्ञापन आह्वान हुँदा १७ जनाले आवेदन दिएका थिए । २०८० माघ २३ गते १५ दिनको समयावधी राखेर दरखास्त आह्वान गरिएको थियो । “१७ जना उम्मेदवारहरु नै छनौट प्रक्रियाको प्रारम्भिक सुचीमा परे ।” स्रोतले भन्यो–“ छनौट गर्दै जाँदा अन्तिम तीन जनाबाट उपकुलति नियुक्तीका लागि विश्वविद्यालयको उपकुलति छनौट तथा कार्यविधि २०८० समेत बनाइएको थियो । तर १७ जनाबाट कुनै तीन जनाको छनौट नै नगरी आर्थिक लाभ लिई उपकुलपति नियुक्त गरियो ।”
श्रेष्ठले कानून र कार्यविधिको धज्जी उडाउँदै अब्बल र कुशल व्यक्तिलाई प्राज्ञिक थलोको जिम्मेवारी दिनुका साटो आर्थिक लाभलाई प्राथमिकतामा राखेर नियुक्त गरेपछि अख्तियारमा उजुरी गरेको उजुरीकर्ताको भनाई छ ।
