काठमाडौं । गृहमन्त्री रमेश लेखकले त्रिभुवन अन्तर्राष्ट्रिय विमानस्थलको अध्यागमन कार्यालयमा भइरहेको अवाञ्छनीय गतिविधिप्रति गम्भीर चिन्ता व्यक्त गर्दै कडा कदम चाल्ने संकेत दिएका छन्।
सोमबार गृह मन्त्रालयमा आयोजित उच्चस्तरीय आन्तरिक बैठकमा मन्त्री लेखकले अध्यागमन सुधारलाई पहिलो प्राथमिकता दिँदै स्पष्ट शब्दमा भने, “अबदेखि अध्यागमनमा हुने कुनै पनि गैरकानुनी क्रियाकलाप सह्य हुने छैन। दोषी कर्मचारी कडाभन्दा कडा कारबाहीको भागीदार हुनेछन्।”
गृह मन्त्रालयका प्रवक्ता रामचन्द्र तिवारीका अनुसार मन्त्री लेखकले अध्यागमनमा खटाइने कर्मचारीका लागि स्पष्ट र कडाइका साथ मापदण्ड तयार पार्न निर्देशन दिएका छन्। साथै, गलत माध्यमबाट व्यक्तिहरू विदेश पठाउने कार्यमा संलग्न जो कोहीलाई कारबाहीको दायरामा ल्याउने उनले चेतावनी दिए।
मन्त्री लेखकले विगतका छानबिन तथा प्रतिवेदनमा उल्लेख गरिएका सुझावहरू कार्यान्वयनमा ल्याउन, कर्मचारीहरूको आचरणमा सुधार ल्याउन तथा अध्यागमनको सम्पूर्ण तथ्यांक सुरक्षित राख्ने उद्देश्यले डिजिटल प्रणालीको स्तरोन्नतिको पनि आदेश दिए।
हालै अध्यागमन कार्यालयमार्फत ‘भिजिट भिसा’को व्यापक दुरुपयोग भइरहेको सार्वजनिक भएपछि मन्त्रालयको ध्यान त्यसतर्फ गम्भीर रूपमा केन्द्रित भएको छ।
बैठकमा गृहसचिव गोकर्णमणि दुवाडीसहित मन्त्रालयका उच्च पदस्थ अधिकारीहरूको उपस्थिति थियो। मन्त्रालयका अनुसार पछिल्लो एक महिनादेखि अध्यागमन सुधारका लागि विभिन्न प्रयासहरू भइरहेको र अब त्यसमा थप गति र कठोरता ल्याइनेछ।
