काठमाडौं : सामाजिक सञ्जाल टिकटकबाट चिनजान बढाउँदै प्रेममा बाँधिएका चर्चित जोडी एलिजे जमाली र आयुष सिंह ठकुरी अब वैवाहिक सम्बन्धमा बाँधिएका छन्। यी दुईले हालै काठमाडौं जिल्ला अदालतमा कानुनी प्रक्रिया पूरा गर्दै कोर्ट म्यारिज गरेका हुन्। वैवाहिक तस्बिरहरू दुवैले आफ्ना सामाजिक सञ्जालमार्फत सार्वजनिक गर्दै सम्बन्धलाई आधिकारिक बनाएका छन्।
इन्स्टाग्राममा विवाहको तस्बिर पोस्ट गर्दै एलिजेले लेखेकी छन्, “उनीहरूले हामीलाई अनलाइन खोजे, तर हामी त यहाँ सधैंको लागि अनलाइनमा हस्ताक्षर गर्दै थियौं। मिस्टर एण्ड मिसेस।” यो जोडीले २०८० साल असोज १९ गते दुबईमा ईन्गेजमेन्ट गरेका थिए। त्यतिबेला उनीहरूको इन्गेजमेन्टका भिडिओ क्लिप्स टिकटकमा भाइरल बनेका थिए, जसले उनीहरूको सम्बन्धलाई झन् चर्चाको केन्द्रमा ल्याएको थियो।
एलिजे मूलतः पाकिस्तानकी नागरिक हुन् भने आयुष नेपालका। दुबईमा बस्दै आएकी एलिजे र नेपालमा रहेका आयुषको चिनजान टिकटक लाइभमार्फत भएको थियो। त्यही अनलाइन भेटघाट प्रेममा परिणत हुँदै वैवाहिक सम्बन्धमा परिणत भएको हो।
पाकिस्तान र नेपालका नागरिकबीचको यो प्रेम कहानीले सुरुदेखि नै दर्शकहरूको ध्यान तानेको थियो। भौगोलिक दूरी र सांस्कृतिक भिन्नताबीच पनि उनीहरूको सम्बन्धले सामाजिक सञ्जालमा व्यापक समर्थन पाएको छ। ईन्गेजमेन्टपछि एलिजे आयुषसँगै बस्ने निर्णयमा पुगेकी छिन्।
