काठमाडौं । एमालेकी राष्ट्रियसभा सांसद भगवती न्यौपाने संघीय मामिला तथा सामान्य प्रशासनमन्त्री बनेकी छिन् । उनलाई मंगलबार प्रधानमन्त्री केपी शर्मा ओलीको सिफारिसमा राष्ट्रपति रामचन्द्र पौडेलले मन्त्री नियुक्त गरेका हुन् । राष्ट्रपति पौडेलले न्यौपानेलाई मन्त्री नियुक्त गरेसँगै सामान्य प्रशासन मन्त्रालयको कार्यभार पनि तोकेका छन् ।
यसअघि सामान्य प्रशासनमन्त्री राजकुमार गुप्ताको घुस डिल गरेको अडियो सार्वजनिक भएपछि उनले मंगलबार बिहान पदबाट राजीनामा दिएका थिए । त्यसपछि रिक्त भएको सो मन्त्रालयमा न्यौपानेलाई नियुक्त गरिएको हो ।
भगवती अनेरास्ववियुको विद्यार्थी राजनीतिबाट उदायकी हुन् । अनेम संघ तनहुँको सचिव हुँदै दुई कार्यकाल अध्यक्ष बनिन् । तनहुँ एमालेको जिल्ला सचिव निर्वाह गरेकी न्यौपाने राष्ट्रियसभा, विधायन व्यवस्थापन समितिको सदस्यसमेत हुन् । न्यौपाने २०७४ सालको स्थानीय तह चुनावमा तनहुँको भानु नगरपालिकाको मेयरमा पराजित भएकी थिइन् ।
