काठमाडौं : केपी ओली नेतृत्वको सरकार फेरि घुसकाण्डको विवादमा मुछिएको छ। सामान्य प्रशासनमन्त्री राजकुमार गुप्तापछि अब अर्का मन्त्री बलराम अधिकारी पनि अडियो प्रकरणमा तानिएका छन्। एक अडियो सार्वजनिक भएको छ जसमा पोखराको १३५ रोपनी जग्गा व्यक्तिको नाममा ल्याउने प्रयासमा ३२ लाख रुपैयाँ घुस लिएको दाबी गरिएको छ।
सार्वजनिक अडियोमा मन्त्री अधिकारीको स्वर नभए पनि उनका छोरा मनोज अधिकारी, तत्कालीन सचिव अर्जुन पोखरेल लगायतको नाम खुलेर उल्लेख गरिएको छ। अडियो अनुसार मन्त्री अधिकारीले घुसको रकम छोरामार्फत लिएको दाबी गरिएको छ। गुप्ता र पोखरेलमाथि पनि रकम लिएको आरोप छ — क्रमशः ३५ लाख र ५ लाख। अडियोमा जग्गा प्रक्रिया अगाडि बढाउन करिब डेढ करोड रुपैयाँ खर्च भइसकेको उल्लेख गरिएको छ।
यसअघि अडियो प्रकरणकै कारण मन्त्री गुप्ता चौतर्फी दबाबमा परेपछि पदबाट राजीनामा दिइसकेका छन्। अधिकारीले भने अडियोमा आफूको नाम स्पष्ट नभएको भन्दै आरोप अस्वीकार गर्दै आएका छन्। उनले गुप्ताको राजीनामा सन्दर्भमा भनेका थिए, “जुन औँलामा विष लागेको हो, त्यही झर्छ।”
यता मन्त्री अधिकारीले राजीनामा दिनुको साटो आफ्नो मन्त्रालयका एक वर्षे उपलब्धिहरू सार्वजनिक गर्न लागेका छन्। आज दिउँसो ३ बजे उनले मन्त्रालयमै पत्रकार सम्मेलन गर्दै आर्थिक वर्ष २०८१/८२ का कामहरूको विवरण प्रस्तुत गर्ने कार्यक्रम रहेको छ। पत्रकार सम्मेलनमा अडियो विवादबारे उनले स्पष्टीकरण दिने सम्भावना छ।
सरकारमा नैतिकताको प्रश्न फेरि उठ्न थालेको छ, तर अधिकारीको पछिल्लो निर्णयले यसलाई ढाकछोप गर्न खोजिएको आशंका पनि गरिएको छ।
