काठमाडौं । गायक तथा संगीतकर्मी प्रकाश सपुतले तीजको अवसर पारेर नयाँ गीत ल्याउने घोषणा गरेका छन्। सामाजिक सञ्जालमार्फत जानकारी दिँदै उनले ‘नाइँ भनेसि नाइँ’ शीर्षकको गीत चाँडै सार्वजनिक हुने बताएका हुन्।
सपुतको नयाँ तीज गीतमा गायिका समीक्षा अधिकारी र विवादित गायिका एलिना चौहानको स्वरसमेत रहनेछ। सार्वजनिक गरिएको पोस्टरमार्फत उनले गीतमा ती दुई गायिकाको सहभागिता रहने जानकारी दिएका छन्।
सामाजिक सञ्जालमा उनले लेखेका छन्, “प्रिय प्रकाश, गीत–संगीत नै तिम्रो जरा हो र यसमार्फत कथा भन्नु तिम्रो विशेषता। हाँगा फैलिनु राम्रो हो तर जरासँग जोडिनुपर्छ र विशेषतालाई छोड्नुहुन्न।”
उनले अगाडि लेखेका छन्, “धेरै शुभेच्छुकहरूको सुझावलाई मनन गर्दै, यसपालिको तीजमा ‘नाइँ भनेसि नाइँ’ मार्फत एउटा आवाज लिएर आउँदैछौँ। आवाजमा आवाज मिसाउन तयार हुनुहोस्।”
सपुतको यो घोषणालाई लिएर उनका समर्थकहरूमा उत्साह बढेको छ भने तीज गीतको प्रतीक्षामा रहेका संगीतप्रेमीहरूका लागि यो नयाँ प्रस्तुति चासोको विषय बनेको छ।
