काठमाडौं । तीजको रौनक नजिकिँदै गर्दा गायिका रचना रिमालले नयाँ तीज गीत ‘बामरी बसायो’ सार्वजनिक गरेकी छन्। सोमबार सार्वजनिक भएको उक्त गीतमा रचना रिमालसँगै गायिकाहरू एलिना चौहान र इन्द्रकला राईको स्वर सुन्न सकिन्छ।
गीतमा दीपक शर्माले शब्द र संगीत दिएका छन् भने नरेन्द्र बियोगीले संगीत संयोजन गरेका छन्। तीनै गायिकाले गीतको भिडियोमा समेत नृत्य प्रस्तुत गरेकी छन्। तिनीहरूसँगै अनुपा विष्टको पनि नृत्य देख्न पाइन्छ।
वर्षदिनमा आउने तीजको उल्लास, नाचगानको उत्साह र माइती सम्झनालाई गीतमा समेटिएको छ। सुरेन्द्र बसेलको कोरियोग्राफी रहेको भिडिओ गम्भीर विष्टले निर्देशन गरेका हुन्। भिडियोको छायांकन नवराज उप्रेतीले र सम्पादन मिलन विश्वकर्माले गरेका हुन्।
यस गीतमार्फत तीजको सांगीतिक माहोल झनै उत्साहित बनाउने प्रयास गरिएको छ।
