काठमाडौं : नेपाली कांग्रेसका सांसद रामहरि खतिवडाले मधेशका नागरिकहरू एक महिनादेखि खानेपानीको अभावमा पिल्सिएको भन्दै संघीय संसद्मा सरकारको ध्यानाकर्षण गराएका छन्।
उनले संसद्मा उभिँदै, “मधेशमा जनताहरू पानीको एक थोपा खोज्दै हैरान छन्, तर खानेपानी मन्त्री नै हराएको सूचना आएको छ,” भन्दै गम्भीर टिप्पणी गरे।
उनका अनुसार मधेश प्रदेशका सबै आठ जिल्लालाई विपद् संकटग्रस्त क्षेत्र घोषणा गरिसकिएको छ र प्रदेश सरकारले ती क्षेत्रहरूलाई सुख्खा क्षेत्रको रूपमा मान्यता दिइसकेको छ।
सांसद खतिवडाले खानेपानी मन्त्रालयले तुरुन्तै आवश्यक कदम चाल्नुपर्ने माग गर्दै, “मन्त्रीलाई संसद्मा उपस्थिति गराई, यस गम्भीर संकटबारे स्पष्ट जानकारी दिन र समाधानका लागि तत्कालीन कार्ययोजना प्रस्तुत गर्न निर्देशन दिइयोस्,” भनेर सभामार्फत सरकारसँग रुलिङको मागसमेत गरेका छन्।
