काठमाडौं । प्रधानमन्त्री केपी शर्मा ओलीले सामाजिक सञ्जालमा लेखेकै आधारमा कसैलाई पनि कारबाही नहुने बताउनुभएको छ । प्रतिनिधिसभाको ‘प्रधानमन्त्री प्रश्नोत्तर कार्यक्रम’ मा सांसदहरूलाई जवाफ दिँदै प्रधानमन्त्री ओलीले हल्लाका आधारमा नभइ तथ्यका आधारमा सरकारले कारबाही गर्ने बताउनुभएको हो । सांसदहरूले प्रधानमन्त्री ओलीलाई भ्रष्टाचार नियन्त्रण गर्न के कति काम भएका छन भनेर प्रश्न गरेका थिए ।
उहाँले आफू भ्रष्टाचार नगर्ने र भ्रष्टाचार पनि नगर्ने संकल्पप्रति आफू दृढ रहेको बताउनुभयो । भ्रष्टाचार गर्नेहरू कानुनी दायराभन्दा बाहिर नरहने बताउँदै प्रधानमन्त्री ओलीले कानुन बमोजिम भ्रष्टाचारमा संलग्नलाई कार्वाही भइरहेको जानकारी दिनुभएको छ ।
त्यसैगरी प्रधानमन्त्री ओलीले संक्रमणकालीन न्यायसम्बन्धी बाँकी काम सम्पन्न गरी शान्ति प्रकृयालाई टुङ्गोमा पुर्याउने विषय सरकारको प्राथमिकतामा रहेको बताउनुभएको छ । आयोगहरू गठन भइ काम सुरू गरिसकेको पनि प्रधानमन्त्री ओलीले जानकारी दिनुभएको छ ।
त्यसैगरी सांसदहरूले युवालाई देशमै रोक्न सरकारको योजनाबारे प्रश्न गरेका थिए । जवाफ दिँदै प्रधानमन्त्री ओलीले देशमै रोजगारीको सृजना गरी वैदेशिक रोजगारबाट फर्किएकालाई उनीहरूको पुँजी सीप र अनुभवलाई उत्पादनमूलक क्षेत्रमा उपयोग गर्नु सरकारको प्राथमिकता रहेको बताउनुभयो । प्रधानमन्त्री ओलीले आलोचनाका लागि कुनै ठाउँ नभएको जिकिर पनि गर्नुभयो।
