काठमाडौं : यी हुन् १७ वर्षीया मेनुका कँडेल र उनकी बहिनी १५ वर्षीया सिर्जना कँडेल । भक्तपुरको मध्यपुर ठिमी नगरपालिको एक घरमा डेरामा बस्दै आएका उनीहरू प्यासेजमा रहेको फलामको डन्डीमा नाइलनको डोरी बाँधेर झुन्डिएको अवस्थामा भेटिएका छन ।
मृतक दिदीबहिनीले बिहीबार बिहान टिकटक बनाएर त्यसमा नाइलनको डोरीसमेत देखाएका थिए। टिकटकमा मरेर गए पनि नतोडिने बन्धन माया हो बोलको गीतमा टिकटक बनाउँदै त्यसमा डोरीको फोटोसमेत देखाएका थिए। उनीहरूको मोबाइलमा पनि आफूहरूले संसार छोड्न लागेको भनेर भिडियो बनाएको देखिन्छ।
मेनुका र शृजना तीन हप्ताअघि मुम्बईबाट ‘कम्प्युटर क्लास’ भनेर निस्किएका थिए तर फर्किएनन्। उनीहरू दुई साताअघि भक्तपुर आएर त्यहाँ डेरामा बस्दै आएका थिए। उनीहरू हराएको भन्दै परिवारले प्रहरीमा उजुरी दिनेदेखि सञ्चारमाध्यमबाट खोजीका लागि हारगुहार गर्दै आएका थिए।
किशोरीका बाबु वासुदेवले सिगास अनलाइन टिभीलाई बताएअनुसार उनी ३० वर्षभन्दा पहिलादेखि भारतमा बस्दै आएका थिए । कान्छी छोरी सिर्जनालाई जन्मेको एक वर्षपछि आफूसँगै लगेका थिए । मृत भेटिएकी दिदी मेनुका भने सुर्खेतमै थिइन् ।
श्रीमती र छोराछोरीसहित वासुवेद मुम्बईमा लामो समयदेखि बस्दै आएका थिए । मेनुकाले पनि बाबुआमासँगै भारत जाने, घुम्ने बस्ने इच्छा देखाएपछि उनलाई पनि सँगै लगिएको थियो । भर्खर भारत गएकी मेनुकालाई हिन्दी आउँदैनथ्यो । छोरीहरूलाई भारतमा बासुदेवले सिलाइबुनाइ र कम्प्युटरको क्लास भर्ना गराइदिएका थिए ।
