काठमाडौं । गृहमन्त्री रमेश लेखक र संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेबिच आज कञ्चनपुरको मझगाउँ विमानस्थल पुनर्निर्माण र स्तरोन्नतिका विषयमा गृह मन्त्रालयमा छलफल भएको छ। विसं २०५६ देखि बन्द रहेको मझगाउँ विमानस्थलको पुनर्निर्माण गरी चाँडो सञ्चालनमा ल्याउने विषयमा मन्त्री लेखक र पाण्डेबिच छलफल भएको हो। उनीहरूसँगै बैठकमा नागरिक उड्डयन प्राधिकरण, कर्पोरेट निर्देशनालयका उपमहानिर्देशक इन्जिनियर बाबुराम पौडेललगायतको सहभागिता थियो।
विमानस्थलको रनवे निर्माण, टर्मिनल भवन निर्माण, विद्युत विस्तारलगायतका विषयमा छलफल भएको गृहमन्त्रीको सचिवालयले जनाएको छ। ‘विमानस्थल पुनर्निर्माण चाँडो सक्ने र अस्थायी रूपमा सञ्चालन गर्ने विषयमा सरोकारवाला अधिकारीसहितको उपस्थितिमा छलफल भएको हो,’ गृहमन्त्री लेखकका प्रमुख स्वकीय सचिव ईश्वरीप्रसाद जोशीले भने, ‘विमानस्थल पुनर्सञ्चालन गृहमन्त्री लेखकको प्राथमिकता र निर्वाचनमा मतदातासामु गरेको प्रतिबद्धता पनि हो, त्यो पूरा हुने प्रक्रियामा छ।’
मझगाउँ विमानस्थलको ७० प्रतिशत काम सम्पन्न भइसकेको छ। चालु आर्थिक वर्ष २०८२/८३ मा विमानस्थलमा टर्मिनल भवन निर्माणका लागि रु पाँच करोड र रनवे निर्माण गर्न रु १३ करोड ३० लाख बजेट सङ्घीय सरकारले विनियोजन गरेको छ। ‘बजेटको सीमितताबिच मझगाउँ विमानस्थल पुनर्निर्माण गर्न राम्रो बजेट विनियोजन गरेका छौं,’ पर्यटनमन्त्री पाण्डेले भने, ‘विमानस्थल पुनर्सञ्चालनलाई प्राथमिकतामा राखेर अघि बढेका छौं।’
मझगाउँ विमानस्थलको दीर्घकालीन महत्त्व रहेको उल्लेख गर्दै गृहमन्त्री लेखकले पुनर्निर्माण र पुनर्सञ्चालनमा अब ढिलाइ गर्न नहुने बताए। ‘सङ्घीय सरकारले विमानस्थलका लागि उचित बजेट सम्बोधन गरेको छ,’ उनले भने, ‘प्रदेश र स्थानीय सरकारले पनि विमानस्थल पुनर्निर्माणमा साझेदारी गरेका कारण काम तीव्र गतिमा अघि बढेको छ।’
कञ्चनपुर क्षेत्र नं ३ बाट निर्वाचित प्रतिनिधिसभा सदस्य र गृहमन्त्री रमेश लेखककै पहलमा लामो समय गौचरनमा परिणत भएको मझगाउँ विमानस्थलले पुनर्निर्माणमा गति पाएको हो। ‘दक्षिणतर्फ नेपाली सेना र रत्न पाटिकाको जमिन विमानस्थलका लागि उपयोग गर्ने विषयमा विगतमा भएको विवाद समाधान भएर काम सुरु भइसकेको छ,’ गृहमन्त्री लेखकले भने, ‘विद्युत विस्तार र सुरक्षा प्रबन्धका लागि पनि पहल भइसकेको छ।’
केही दिनअघि विमानस्थलको स्थलगत निरीक्षणका लागि मझगाउँ पुगेका गृहमन्त्री लेखकले विमानस्थल पुनर्निर्माणमा कुनै समस्या नहुने बताएका थिए। एक हजार ५ सय २५ मिटरको रनवे निर्माण गर्ने क्रममा नेपाली सेनाले एक सय ५० मिटर जमिन विमानस्थल विस्तारका लागि उपलब्ध गराइसकेको छ। रनवे निर्माण आगामी माघसम्म सक्ने गरी काम अघि बढेको मन्त्रालयले जनाएको छ ।
