काठमाडौं । नेपाली सांगीतिक क्षेत्रमा आफ्नो छुट्टै पहिचान बनाउँदै आएका बहुप्रतिभाशाली गायक कृष्ण बिकले आफ्नो नयाँ गीत “आँखा मार्ने” सार्वजनिक गरेका छन्। गायन, संगीत, शब्द र निर्देशन सबै पक्षमा उनले आफैँ सक्रिय भूमिका निभाएका छन्, जुन उनको बहुआयामिक क्षमताको प्रमाण हो।
गीतको म्युजिक भिडियोमा प्रियंका कार्की, नाजिर हुसेनसँगै नविन ओडको पनि अभिनय देख्न पाइन्छ। तिनै कलाकारहरूको आकर्षक अभिनय, रोमान्टिक भाव, जीव्त नृत्य र आधुनिक प्रस्तुति भिडियोको मुख्य आकर्षण बनेको छ।
यो गीत कृष्ण बिकको आधिकारिक युट्युब च्यानलबाट सार्वजनिक गरिएको हो। समाचार तयार पार्दासम्म युट्युबमा गीतले १ लाख ५० हजार (डेढ लाख) भ्युज पार गरिसकेको छ भने हजारौं टिकटक भिडियोहरू यस गीतमा निर्माण भइसकेका छन्। यो आँकडाले दर्शक तथा स्रोतामाझ गीतको लोकप्रियता उच्च रहेको स्पष्ट देखिन्छ।
गायक कृष्ण बिक यसअघि पनि नेपाली चलचित्र र संगीत क्षेत्रमा चर्चित कलाकारहरूसँग सहकार्य गर्दै आएका छन्। विशेषतः महानायक राजेश हमालसँगको सहकार्यमा तयार पारिएको “हजुर मुसुक्कै” गीतबाट उनले ठूलो चर्चा कमाएका थिए। त्यसपछिका उनका गीतहरूले पनि निरन्तर सफलताको शिखर चुमिरहेका छन्। “आँखा मार्ने” गीतले कृष्ण बिकको कलात्मक यात्रामा नयाँ उचाइ थपेको छ।
