काठमाडौं । नेपालको सबैभन्दा चर्चित फ्रेन्चाइज क्रिकेट प्रतियोगिता नेपाल प्रिमियर लिग (एनपीएल) को दोस्रो संस्करण मिति सार्वजनिक गरिएको छ। क्रिकेट संघ नेपाल (क्यान) ले बिहीबार सामाजिक सञ्जालमार्फत जानकारी दिँदै प्रतियोगिता २०२५ नोभेम्बर १७ (मंसिर १) देखि डिसेम्बर १३ (मंसिर २८) सम्म सञ्चालन हुने घोषणा गरेको हो।
यसअघिको संस्करणमा जनकपुर बोल्ट्सले उपाधि जितेको थियो। त्यसैले दोस्रो संस्करणमा अन्य टोलीहरूले उपाधि कब्जा गर्ने लक्ष्यसहित तयारी थालेका छन्।
यस पटकको लिगका लागि खेलाडीको मिनी अक्सन प्रक्रिया सम्पन्न भइसकेको छ। अक्सनपछि अधिकांश टोलीले आफ्ना स्क्वाड तयार पारेका छन् भने केहीले अझै विदेशी खेलाडी अनुबन्धन गर्ने अन्तिम चरणमा रहेका छन्। विदेशी स्टार खेलाडी भित्र्याउने प्रतिस्पर्धाले लिगलाई थप आकर्षक बनाउने अपेक्षा गरिएको छ।
एनपीएललाई घरेलु क्रिकेटमा ठूलो परिवर्तन ल्याउने टुर्नामेन्टका रूपमा हेरिएको छ। यसले युवा खेलाडीलाई अन्तर्राष्ट्रिय स्तरका खेलाडीहरूसँग खेल्ने अवसर दिने मात्र होइन, नेपाली क्रिकेटलाई विश्वभर चिनाउने महत्वपूर्ण माध्यम हुने आशा राखिएको छ।
दोस्रो संस्करणमा सहभागी हुने टोलीहरूको अन्तिम सूची र खेल तालिका छिट्टै सार्वजनिक गरिने क्यानले जनाएको छ।
