काठमाडौं : चर्चित अभिनेता अनमोल केसी अभिनीत नयाँ चलचित्र *‘जेरी : अन टप’*को टिजर सार्वजनिक भएको छ। टिजरले दर्शकलाई कथावस्तुको झलक मात्र नभई पात्रहरूको भावनात्मक यात्रा पनि देखाउने प्रयास गरेको छ।
सुयोग गुरुङको निर्देशनमा बनेको यस फिल्मले सगरमाथा आरोहण र साहसिक यात्राको बीचमा जन्मिएको प्रेमकथालाई मुख्य विषय बनाएको छ। फिल्ममा अनमोलसँगै जसिता गुरुङ, आँचल शर्मा, केदार घिमिरे ‘माग्ने बुढा’, भुवन केसी र उषा खड्गीको पनि सशक्त अभिनय देख्न पाइनेछ। पटकथा भने हेमराज बीसीले लेखेका हुन्।
रोमान्टिक ड्रामा जनरामा तयार भएको चलचित्रलाई सरोज न्यौपानेको प्रस्तुतीमा रोविन शेरचन, रामकृष्ण श्रेष्ठ र दीपक भण्डारीले निर्माण गरेका हुन्। सगरमाथा क्षेत्र, मुस्ताङ र काठमाडौंमा गरिएको छायांकनले फिल्मलाई दृश्यात्मक सौन्दर्य दिएको छ भने एउटा गीत विशेष रूपमा भारतको जयपुरमा खिचिएको छ।
तिहार नजिकिँदै गर्दा ‘जेरी : अन टप’लाई दर्शक सामु ल्याउने तयारी भइरहेको छ। फिल्म ३१ असोज (१७ अक्टोबर) मा देशभर रिलिज हुनेछ।
