काठमाडौं । नेपाली बजारमा सुनको मूल्य ऐतिहासिक रूपमा नयाँ कीर्तिमान बनाउँदै तोलामा २ लाख रुपैयाँ नाघेको छ। नेपाल सुनचाँदी व्यवसायी महासंघका अनुसार शुक्रबार छापावाल सुनको मूल्य तोलामा १ हजार २ सय रुपैयाँले वृद्धि भई २ लाख ६ सय रुपैयाँमा कारोबार भइरहेको छ, जुन अहिलेसम्मकै उच्च मूल्य हो।
यसअघि बिहीबार सुन तोलामा १ लाख ९९ हजार ४ सय रुपैयाँमा कारोबार भएको थियो। लगातारको मूल्यवृद्धिले सुन खरिद–बिक्री गर्ने सामान्य उपभोक्तादेखि लगानीकर्तासम्मलाई प्रभावित बनाएको छ। सुन परम्परागत रूपमा सुरक्षित लगानीको माध्यम मानिँदै आएको छ, तर पछिल्लो मूल्यवृद्धिले मध्यमवर्गीय उपभोक्तामा थप बोझ बढाएको देखिन्छ।
महासंघका अनुसार अन्तर्राष्ट्रिय बजारमा देखिएको अस्थिरता, अमेरिकी डलरको मजबुती, तथा भू–राजनीतिक तनावका कारण सुनको मूल्य उच्च स्तरमा पुगेको हो। नेपालजस्तो आयात–निर्भर बजारमा अन्तर्राष्ट्रिय मूल्यवृद्धिको सीधा असर पर्ने भएकाले आगामी दिनमा मूल्य अझै उतारचढाव हुने अनुमान गरिएको छ।
यस्तै, सुनसँगै चाँदीको मूल्य पनि बढेको छ। आज चाँदी तोलामा ५ रुपैयाँले वृद्धि भई २ हजार ३ सय ६० रुपैयाँमा कारोबार भइरहेको महासंघले जनाएको छ।
सुनचाँदी दुवैको मूल्य वृद्धिले आगामी दिनमा बजारमा खरिद–बिक्री घट्ने सम्भावना रहेको र उपभोक्ता लामो समय मूल्य स्थिरता पर्खने अवस्था सिर्जना हुने अनुमान गरिएको छ।
