काठमाडौं । आगामी दशैंको फूलपाती अर्थात् असोजको १३ गतेबाट प्रदर्शनमा आउने सिनेमा ‘माइतीघर’को शिर्षक गीतको नृत्य प्रतियोगीतामा दर्शकको उत्साहजनक सहभागीता भइरहेको छ । सोमबारबाट सुरु भएको यो प्रतियोगीताका विजेताले ५ लाख नगद पुरस्कार प्राप्त गर्नेछन् ।
असोजको १२ गतेसम्म यो प्रतियोगीता जारी रहने निर्माणपक्षले बताएको छ । निर्माता रोहित अधिकारी भन्छन्-‘दर्शकहरुले २४ घन्टा पनि नवित्दै यति धेरै भिडियो बनाएर पठाउनुभएको छ कि, हामी आफै अचम्मित परेका छौं । दर्शकको यो सहभागीताले हामीलाई उत्साहित बनाएको छ । कतिपय भिडियोहरुमा त दर्शकको मिहिनेत देखेर हामी आफै छक्क छौं । दर्शकहरुले भिडियोलाई उत्कृष्ट बनाउन कुनै कसर नै बाँकी राख्नु भएको छैन । २४ घन्टा नवित्दै ओएसआर डिजिटलको विभिन्न सामाजिक प्लेटफर्ममा १५-२० लाख भ्यूज आइसकेको छ ।’
रोहितले दर्शकहरुको यो उत्साहले आफूहरुलाई अझै उर्जा थपिएको बताए । सुरुवातमा यसको निर्माणपक्षले यो भिडियो प्रतियोगीतामा प्रथम हुनेलाई ५ लाख नगद पुरस्कार दिने घोषणा गरेको थियो । तर, अब दोस्रो र तेस्रो हुनेलाई पनि पुरस्कार दिने बताएको छ । साथै, सहभागीता जनाउनेहरुको पनि हात खाली नहुने रोहितले जानकारी दिए ।
सञ्जिवनीको स्वरमा समावेश यो गीत सार्वजनिक भएसँगै चर्चामा छ । यो गीतमा ४० सेकेन्डदेखि २ मिनेटसम्मको नृत्य गरेर भिडियो बनाउनेहरुमध्येबाट एक जनालाई ५ लाख नगद पुरस्कार दिने घोषणा गरिएको हो । गीतको भिडियोमा उपासना सिंह ठकुरी र श्यामाश्री शेर्पाले नृत्य गरेका छन् । कविराज गहतराजको कोरियोग्राफी रहेको गीतको भिडियोलाई मानकृष्ण महर्जन र सुशन प्रजापतिको छायांकन छ । सिनेमामा सुरेन्द्र पौडेलको सम्पादन छ ।
सिनेमामा केदार प्रसाद घिमिरे, धिरज मगर, प्रकाश सपुत, उपासना सिंह ठकुरी, श्यामाश्री शेर्पा, युवराज लामा, वुद्दि तामाङ, शिशिर वाङ्देल, रजनी गुरुङ, सन्तोष शाही, फूलकुमार बमजम, संगीता थापा लगायतका कलाकारहरुको अभिनय छ । चन्द्रकुमार दोङको कथा रहेको सिनेमामा रामशरण पाठकको पटकथा तथा संवाद छ । रबिन शेरचन र धिरज तामाङको लगानी रहेको सिनेमाका कार्यकारी निर्माता ईश्वर श्रेष्ठ र निरज कटुवाल हुन् ।
