काठमाडौँ । एउटा गीत राम्रो बन्नुमा धेरै कुराहरुको समिश्रण हुन्छ तर त्यसको सुरुवात भने गीतकार बाट हुन्छ जसले शब्द रचना गरेका हुन्छन । नेपाली गीत संगीतको कुरा गर्दै जाँदा गीतकारहरुको कमि यहाँ पनि छैन तर परिचित गीतकारको संख्या भने कम नै छ ।
उसै त गीत सफल हुन्छ तर गीतकार सधै छायाँमा पर्नु पर्ने अर्को बाध्यता गीत संगीत क्षेत्रको हो । तर यहि भिडमा आफ्नो पहिचान बनाउँदै अगाडी बढिरहेका एक हुन् सुधा मरहट्टा ।
निकै लामो समय देखि लेखन विधामा आफुलाई निखार्ने प्रयासमा गीतकार सुधा मरहट्टा अगाडी बढिरहेकी एक कुशल गीतकार हुन् । उनैको शब्द रचनामा तयार भएको ‘ख्याल ठट्टा’ बोलको गीत बजारमा सार्वजनिक भएको छ । गीतमा गायक राजेश पायल राईले एकल स्वर भरेका छन् । शंकर थापा स्माईलको संगीत रहेको गीतलाई उदय राज पौडेलले अरेन्ज गरेका छन् ।
गीतको भिडियो पनि निर्माण पक्षले राम्रो बनाउने प्रयास गरेको देखिन्छ । सशान कंडेलको निर्देशन रहेको भिडियोमा हाँस्य कलाकार किरण केसी, मोडल कमल सिंह, अश्मिता जुरेली र रोहन श्रेष्ठको अभिनय हेर्न सकिन्छ । यस्तै भिडियोमा पाहुना कलाकारको रुपमा कविता सुनामको पनि अभिनय देख्न सकिन्छ । दिपक गिरीले भिडियोको छायांकन गरेका छन् भने विकास दाहालले भिडियोको सम्पादन र कलर गर्ने काम गरेका छन् । प्रख्यात घिमिरेको भिडियोमा कोरियोग्राफी रहेको छ ।
भिडियोमा अनुराग रईगाई र सुधा मरहट्टाको लगानी रहेको छ । बिदेशमा बसेर नेपाली गीत संगीतको मोह त्याग गर्न नसकेकी गीतकार सुधा मरहट्टाले दर्शक श्रोताको साथ मिल्दै गयो भने आगामी दिन अझै राम्रो गीत बजारमा निकाल्ने बिश्वास ब्यक्त गरेकी छिन् ।
