काठमाडौं । पूर्वमिस नेपाल तथा सञ्चारकर्मी माल्भिका सुब्बाले श्रीमान रियाज श्रेष्ठसँग सम्बन्ध विच्छेद गरेकी छन्। प्रियंका कार्कीको पडकास्टमा अतिथि बनेर पुगेकी उनले दुई वर्षअघि सम्बन्ध विच्छेद गरेको बताएकी हुन्। आफ्नो निजी जीवनका विषयमा अहिलेसम्म माल्भिकाले सार्वजनिक रुपमा बोलेकी थिइनन् । श्रीमानसँगको डिभोर्सलाई पनि उनले मिडियाबाट लुकाएर राखेकी थिइन् ।
छोरा दुई वर्षको हुँदा घर छाडेको बताउँदै उनले भनिन्, ‘मेरो विवाह बिग्रिसकेपछि त्यो घर छोडेर जाँदा हाम्रो सम्बन्ध एकदम राम्रो थिएन। हामी एक-अर्कासँग बोल्न पनि सक्दैनथ्यौं। हामी जहिले झगडा गथ्यौं। छोरा दुई वर्षको हुँदा घर छोडेँ। मलाई धेरै गाह्रो भइसकेपछि म एक्लैले त्यो निर्णय लिएँ, मलाई मेरो परिवारको पनि समर्थन थिएन। अहिले उहाँहरूलाई ठिक छ। त्यो सपोर्ट सिस्टम लिन पनि मलाई अर्को तीन–चार वर्ष लाग्यो।’’
‘मैले सम्बन्ध विच्छेद गर्दा केही लिइनँ। मलाई केही चाहिदैन बच्चाको लागि मात्र हेरदेऊ भनें। हामीले सम्झदारीमै छोराको को-कस्टडी गर्ने निर्णय लियौं। सम्बन्ध विच्छेद गरेर पछुताएको होइन तर त्यतिबेला मैले रित्तो महसुस गरेँ,’ उनले भनिन्। श्रीमानसँगको सम्बन्ध बिग्रिए पनि छोरालाई उसको बुवा र परिवारबाट कहिले पनि नछुट्टाउने आफ्नो सोच रहेको उनले बताइन्।
माल्भिका र रियाजको अन्तरजातीय विवाह थियो । दुई परिवारको संस्कृति र परम्परामा धेरै फरक भएकाले पनि समस्या उब्जिएको माल्भिका बताउँछिन् । आफूले छोराको न्वारन साधारण तरिकाले गर्न चाहे पनि श्रीमान र परिवारको दबाबले उनीहरुकै रीतिरिवाजअनुसार गर्नुपरेको उनको भनाइ छ ।
‘म उहाँको परिवारलाई धेरै सम्मान गर्छु । सासूससुराले मेरो छोरा हुर्काउन एकदमै सपोर्ट पनि गर्नुभएको छ । तर, हामीबीच सांस्कृतिक र वैचारिक भिन्नता धेरै थियो । त्यसैले एडजस्ट हुन गाह्रो भयो’, उनले भनिन् ।
