काठमाडौं । बहुप्रतिभाका धनी चर्चित अभिनेता जयकिशन बस्नेत स्टारर चलचित्र ‘बद्री बहादुर’ यसै वर्षको चैत २३ गतेबाट सार्वजनिक हुने भएको छ । यो चलचित्रको निर्माण समूहले पोष्टर सार्वजनिक गर्दै देशभरका सिनेमा हलहरुमा प्रदर्शन गर्ने मिति पक्का भएको जानकारी दिइएको हो । विजय गोपाल दली प्रस्तुतकर्ता रहेको यस चलचित्रको कार्यकारी निर्माता रवि अधिकारी हुन् भने निर्माता मिथुन भोटे रहेका छन् । एबि पिक्चर्स फार्म र सलोन सलिना फिल्मस्को संयुक्त ब्यानरमा निर्माण भएको चलचित्रको निर्देशन शोभित बस्नेतले गरेका छन् ।
हाल सार्वजनिक भएका पोष्टरहरुमा जयकिशनका अलावा सलोन बस्नेत, शोभित बस्नेत, राजिवजंग बस्नेत, पुजा शर्मा र छुल्ठिम गुरुङको मूख्य भूमिका रहेको देखाइएको छ । बताइए अनुसार चलचित्र हाँस्य जनारामा निर्माण गरिएको । चलचित्रको जनारा अनुसार हाँस्यरसमा मुख्य भूमिका जयकिशन बस्नेतको रहेको छ भने श्रृंगारिक प्रेमी–प्रेमिकाको रुपमा पूजा र सलोनले भूमिका निर्वाह गरेका छन् । कथाअनुसार अन्य कलाकारहरु पनि आफ्नो मुख्य भूमिकामा रहेको निर्माण समूहले जानकारी दिएको छ ।
अभिनेता जयकिशनले परिवारकै सदस्य सम्मिलित चलचित्र नखेल्ने सोच बनाएको भए पनि यो चलचित्रको कथाको बेस तथा सबै पात्रमाथि गरिएको न्यायलाई हेरेर उक्त भूमिका स्विकार गरेको बताए । निर्देशकसमेत रहेका आफ्ना दाइ शोभितले मरिहत्ते गरेको कारणले पनि यो चलचित्र आफूले खेलेको उनको भनाइ रहेको छ । जयकिशन अभिनित गीत ‘कट्टा हान्दिन्छु’ सुपरहिट भएकाले पनि शोभित आफ्नो चलचित्र चल्नेमा ढुक्क देखिएका छन् ।
सार्वजनिक भएको चलचित्रको पोष्टरमा ‘धेरै हाँस्न नसक्नेले यो चलचित्र नहेर्नुहोला’ भनिएको छ । जसले गर्दा पनि चलचित्र हाँस्य जनाराकै रहेकोमा दुईमत छैन । अभिनेता जयकिशनले आफू सहितका अन्य कलाकारहरुले समेत अभिनय गर्नेक्रममा नै हाँसो थाम्न नसकेर कैयौं टेक खान परेको स्मरण गर्दै दर्शक झन् त्योभन्दा बढी हाँस्ने भएकोले पहिले नै सचेत गराइएको जानकारी दिए ।
