मोन्टी देसाईको भावुक विदाई

खेलकुद

काठमाडौं । २०२३ मा अन्तर्राष्ट्रिय एकदिवसीय मान्यता गुम्ने संघारमा पुगेको नेपाली राष्ट्रिय क्रिकेट टोलीलाई एक चमत्कारी स्पर्श चाहिएको थियो । त्यसैबेला मञ्चमा देखा परे मोन्टी देशाई । उनको नेतृत्वमा नेपालले मात्र क्रिकेट खेलेन, इतिहास बनायो ।

नेपालको अप्रत्याशित पुनरागमन, लगातार जीत, विश्वकप छनोटमा उत्कृष्ट प्रदर्शन । यी सबै मोन्टीको रणनीतिक चातुर्यताको उपहार थियो । नेपाली क्रिकेट प्रेमीहरूका लागि उनी ‘मोन्टी म्याजिक’ का पर्याय बने । तर, पछिल्ला प्रदर्शन लयमा थिएन र अपेक्षाहरू पूरा हुन सकेनन् । जसका कारण क्यानले मोन्टीलाई विदाई गरिदिएको छ ।

नेपाली क्रिकेट टिमका मुख्य प्रशिक्षक मोन्टी देसाई अन्ततः आफ्नो दुई वर्षे सम्झौता पूरा गरेर बिदा हुने भएका छन् । तर उनले एक संघर्षपूर्ण यात्रा, उतारचढावका अनेकौं कथाहरू, अनि नेपाली क्रिकेटलाई नयाँ आत्मविश्वास दिने इतिहास छोडेर जानेछन् ।

देशाईको भविष्यबारे अड्कलबाजी त गत असारमै सुरु भइसकेको थियो, जब नेपाल आइसिसी टी–ट्वान्टी वल्र्ड कप खेलेर स्वदेश फर्किएको थियो । विश्वकपमा दक्षिण अफ्रिका, बंगलादेश, श्रीलंका र नेदरल्यान्ड्ससँग खेलेर नेपालले जम्मा एक अंक मात्र जोड्न सकेपछि उनलाई हटाउनेबारे क्यानभित्र बहस सुरु भएको थियो । तर, मोन्टीको आगमन हुँदासम्म नेपाली क्रिकेटको अवस्था डगमगाइरहेको थियो ।

एकदिवसीय मान्यता जोगाउने संघर्ष, विश्वकप ग्लोबल छनोटको चुनौती, अनि अन्तर्राष्ट्रिय स्तरमा टिकिरहने अन्योल । तर, उनले हिम्मत हारेनन् । नेपाली क्रिकेटलाई संकटको छेउबाट तानेर बीच मैदानमा ल्याए । उनको प्रशिक्षणमा नेपालले ऐतिहासिक खेलहरू जित्यो, नयाँ उचाइहरू छोयो अनि क्रिकेटप्रेमीहरूलाई एउटा ठूलो सपना देख्न बाध्य बनायो– टेस्ट राष्ट्र बन्ने सपना !

Leave a Reply

Your email address will not be published. Required fields are marked *