काठमाडौं । अभिनेता सलोन बस्नेतको निर्माणमा बनेको पहिलो फिल्म ‘रंगी’ को विशेष प्रिमियर बुधबार साँझ राजधानीमा सम्पन्न भयो। प्रिमियरमा उपस्थित दर्शक तथा चलचित्रकर्मीहरूले फिल्मको कथा, निर्देशन र प्राविधिक पक्षको प्रशंसा गरेका छन्।
सान्भी इन्टरटेनमेन्ट प्रालिले निर्माण गरेको यो फिल्म बाबुछोरीको सम्बन्ध तथा पारिवारिक संवेदनामा केन्द्रित छ। सलोनले यो प्रोडक्सन हाउस आफ्नी छोरीको नाममा स्थापना गरेका हुन्। प्रिमियरमा सलोन आफ्नी पत्नी करिश्मा केसीसँगै पूर्व मिस नेपाल तथा अभिनेत्री नम्रता श्रेष्ठ, अन्य कलाकार तथा चलचित्रकर्मीहरूसँग देखिए। फिल्मका निर्देशक सुरेश न्यौपानेको यो पहिलो निर्देशन हो।
फिल्म हेरेपछि निर्देशक तथा अभिनेत्री दीपाश्री निरौला, अभिनेता निर्मल शर्मा, कमेडियन भरतमणि पौडेल, गम्भीर विष्ट, र ज्ञानेन्द्र देउजालगायतले फिल्मको कथावस्तु मनपरेको प्रतिक्रिया दिए। साथै, निर्देशन, प्रस्तुति, र प्रविधिक पक्षको पनि प्रशंसा गरे।
फिल्ममा दिलीप रायमाझी, आयुषी ढकाल, उत्तम केसी, सुमिन गुरुङ, र विशाल पहारीको अभिनय रहेको छ। निर्माणमा सक्षम सुवेदी, करिश्मा केसी, र अनिश गौतमको संलग्नता छ, जहाँ सलोनकी पत्नी करिश्माले विशेष साथ दिएकी छन्।
फिल्मको पटकथा सुमन गजमेरले लेखेका हुन् भने छायांकन सौरभ लामाले गरेका छन्। संगीत दुर्गेश थापा, आमेश भण्डारी, र भीम बिसीले तयार पारेका छन्। फिल्मको सम्पादन बन्दे प्रसादले गरेका छन् भने रङ सम्पादन राजेन्द्र मोक्तानले गरेका छन्। नृत्य निर्देशन कविराज गहतराज र शिशिर खातीले सम्हालेका छन्। फिल्मको वितरण एप्पल इन्टरटेनमेन्ट, एफडी, र रिच इन्टरटेनमेन्टले गर्नेछन्।
