काठमाडौं : अमेरिकाबाट निष्काशन गरिएर नेपाल फर्काइएका नेपालीहरूसँग नेपाल प्रहरीले सोधपुछ गरेको छ। उनीहरूलाई प्रहरीको मानव बेचबिखन अनुसन्धान ब्युरोमा लगेर अमेरिका जान प्रयोग गरिएको प्रक्रियाबारे जानकारी लिइएको छ।
ब्युरोका प्रवक्ता प्रहरी उपरीक्षक नरेन्द्र कुँवरका अनुसार प्रारम्भिक अनुसन्धानमा केही नेपालीहरू ब्राजिल हुँदै अमेरिका पुगेको खुल्न आएको छ। यस क्रममा अध्यागमन कानून उल्लङ्घन गरेकाले उनीहरूलाई अमेरिका सरकारले फिर्ता पठाएको हो।
सोधपुछका क्रममा उनीहरूलाई अमेरिका पठाउने एजेन्टहरूको संलग्नताबारे सोधिएको थियो। तर, हालसम्म कुनै पनि व्यक्तिले ती एजेन्टहरूविरुद्ध उजुरी दिन इच्छुक नरहेको कुँवरले बताए।
“भिसा प्रक्रियामा एजेन्टहरू संलग्न भएको बताइएको छ। तर, पीडितहरूले उनीहरूविरुद्ध मानव बेचबिखनको उजुरी दिन चाहेका छैनन्,” प्रवक्ता कुँवरले भने।
बुधबार चार्टर्ड विमानमार्फत आठ जना र कतार हुँदै एक जना नेपाली नेपाल फर्किएका थिए। प्रहरीका अनुसार सोधपुछ प्रक्रिया सकिएपछि उनीहरूलाई परिवारको जिम्मा लगाइने छ।
