काठमाण्डौ : रियल लाइफ र रील लाइफ दुबैमा डिभोर्सको पीडा… अनि अभिनयमा आँसु र यथार्थ मिसिएको कथा। चर्चित निर्देशक विक्रम चौहानको निर्देशनमा तयार भएको नयाँ म्युजिक भिडियो ‘डिभोर्स’ अहिले चर्चाको शिखरमा छ।
के यो संयोग मात्र हो? कि नियतिको खेल? केही समयअघि मात्र शिल्पा पोखरेलले निर्माता छवि ओझासँगको वैवाहिक सम्बन्धमा आधिकारिक रूपमा डिभोर्स गरेकी थिइन्। अहिले भने म्युजिक भिडियोमा पनि उनी डिभोर्सकै कथामा देखिएकी छन्।
उनको अनुहारमा देखिएको पीडा, आँखामा भरिएका आँसु र संवादविहीन भावनाले यो भिडियोमा ‘अभिनय होइन, यथार्थ’ झल्किएको महसुस गराउँछ। दर्शकहरू भन्दैछन् — “शिल्पा ले अभिनय गरिनन्, आफ्नो भोगाइ उतारिन्।”
सधैँझैँ, भिडियो अभिनयका किंग विक्रम बुढाथोकीको भूमिकाले अझ कथा बलियो बनाएको छ। ‘डिभोर्स’ गीतले एउटै सम्बन्धमा बाँधिएका दुई जोडीबीचको असमझदारी, झगडा र अन्ततः सम्बन्ध विच्छेदसम्म पुग्ने कथा बोकेको छ। प्रेमले सुरु भएको सम्बन्ध कसरी समयसँगै बिथोलिन्छ र तीतो मोडमा पुग्छ भन्ने भावनात्मक कथा भिडियोमा देखाइएको छ।
भिडियो प्रेम, भरोसा, धोका र अन्ततः डिभोर्ससम्मको यात्रा हो। शुरुमा प्रेमको फूल फुल्छ, तर अन्त्यमा बिछोडको काँडाले रगताम्य बनाउँछ। ‘डिभोर्स’ भिडियोले एउटा यथार्थलाई कलात्मक रूपमा उठाएको छ। सम्बन्ध कहिले बलियो, कहिले कमजोर हुन्छ। र कहिले-काहीँ प्रेममै प्वाल परेको अनुभव बिझाउँछ। यो भिडियो आजको पुस्ताको माया र बिछोडको सत्य कथा हो।
