काठमाडौं : हरिवंश आचार्यको मुख्य भूमिका रहेको बहुप्रतिक्षित फिल्म हरिबहादुरको जुत्ताले आफ्नो दोस्रो गीत सार्वजनिक गरेको छ। ‘ढाका टोपी शिरैमा’ बोलको उक्त गीतमा संगीतकार दीपक शर्माको धुन, दानबहादुर कार्कीको शब्द, आशिष अविरल र मेलिना राईको स्वर रहेको छ। गीतको भिडियोमा हरिवंश आचार्यसँगै गायक तथा अभिनेता प्रकाश सपुत र अभिनेत्री स्वस्तिमा खड्का फिचर्ड छन्।
गीत सार्वजनिक गर्नु अघि हरिवंश, स्वस्तिमा र प्रकाश सपुत सामाजिक सञ्जालमा लाइभ आएर फिल्मबारे संवाद गरेका थिए। सो क्रममा हरिवंशले आफ्नै लोकप्रिय पात्र ‘हरिबहादुर’को पुनरागमनबारे चर्चा गर्दै भने, “सुरुवातमा यो पात्रलाई फिल्ममा उतार्दा शंका थियो, तर प्रक्रियामा जाँदा सिनेमालाई सुहाउने क्यारेक्टर बनेको छ। बच्चाले अझै मन पराउनेछन्।”
स्वस्तिमा खड्काले भने, “हरिबहादुर–मदनबहादुर सिरिज मन पराउने दर्शकलाई यो फिल्म रोचक लाग्नेछ। म आफैं दर्शकको हैसियतमा हेर्दा अझै रमाइलो हुने जस्तो लाग्छ।” प्रकाश सपुतले पनि आफ्नो अनुभव बाँड्दै भने, “हाम्रो पुस्तामा रमाइलो भनेकै मह–सिरिज थियो। हामीले हात धुनदेखि धेरै कुरा त्यहीँबाट सिक्यौं।”
फिल्ममा प्रियंका कार्की, दिव्यदेव पन्त, हरिहर शर्मा, राजाराम पौडेल, दिनेश काफ्ले र कमलमणी नेपालको पनि अभिनय छ। एसएम मोसन पिक्चर्सको ब्यानरमा सरोज ओली र मोहितवंश आचार्यद्वारा निर्माण गरिएको यस चलचित्रमा कृष्ण थापाको छायांकन र नहकुल खड्काको सम्पादन रहेको छ। ‘हरिबहादुरको जुत्ता’ आगामी असोज १३ गते, दशैंको फूलपातीका दिनदेखि प्रदर्शनमा आउने तयारीमा छ।
