काठमाडौं । शुक्रबार साँझ एउटा गीत रिलिज भयो । भिडियो सहितको गीतको बोल थियो– हुने नहुने भयो –यहाँ आँखा नरुने भयो । गीतको निष्कर्ष हो– पीडित नै थप पीडित भयो । पीडकले उल्टै सहानुभूति पायो । बिम्ब र प्रतीकको भरपूर प्रयोग गरेर मानवीय प्रवृत्तिप्रति व्यङ्ग्य गर्दै यो गीत शब्द सिर्जना गरेका हुन्– गीतकार राजेन्द्र थापाले ।
यो गीत जसले गायो उसैका लागि अर्थात् समीक्षा अधिकारीलाई हेरेर लेख्नु भएको हो ? जवाफमा उनले भने– हो । “हो समीक्षाकै लागि लेखेको हो । उसैका लागि संगीत गराएको हो । म्युजिक नेपाललाई उसैका लागि रिक्वेस्ट गरेको हो,” गीतकार थापाले स्पष्ट पारे ।
गीतको शब्द जति मार्मिक छ, त्यसको प्रतिबिम्व रेकर्डिङमा पनि देखियो । शब्द र संगीतको ताकत कति हुन्छ स्पष्ट देखियो । “पहिला त खुरु खुरु रेकर्डिङ भयो । बिचमा अचानक रुवावासी भयो । फेरि सम्हालिन् फेरि रुवावासी,” थापाले गीत रेकर्डिङको पल सम्झिए । गीतको भिडियोमा समीक्षा रुएको सुनिन्छ । त्यो रेकर्डिङ गर्दा समीक्षा रुएको नेचुरल रुवाई भएको उनले सुनाए ।
केही समय अगाडि नावालिग गायिका कमला घिमिरेको गीतले गरेको व्यङ्ग्यले पनि समीक्षालाई असह्य बनाइरहेका बेला आफ्नै भोगाइको गीतले उनलाई थप उद्देलित बनाइरहेको समयमा गीत भिजुअल निर्माण भएको गीतकार थापाले जानकारी दिए । समीक्षाको आँखामा पीडा देखेपछि निर्माण टिम के गर्ने भन्ने असमानजस्य अवस्थामा पुगेका बेला समीक्षा सम्हालिँदै टिमलाई भरोसा दिँदै छायांकन सकेको थापा स्मरण गर्छन् । पुरुषोत्तम न्यौपानेले संगीत गरेको गीतमा गोपाल रसाइलीको संगीत संयोजन रहेको छ । भिडियो निर्देशन राजिव लोहनीको छ भने भिजुअलमा समीक्षा स्वयं देखिएकी छन् ।
