काठमाडौं । न्युजिल्याण्डलाई हराउँदै आयोजक भारत आइसिसी एक दिवसीय क्रिकेट विश्वकपको फाइनलमा पुगेको छ । मुम्बईको गएराति भएको खेलमा भारतले न्युजिल्याण्डलाई ७० रनले हरायो । टस जितेर पहिले ब्याटिङ गरेको भारतले ५० ओभरमा ४ विकेटको क्षतिमा ३ सय ९७ रन जोड्यो । उसका लागि विराट कोहलीले ११७ रन जोडे । उनले एकदिवसीय क्रिकेटमा सर्वाधिक ५०औं शतक प्रहार गरेका हुन् ।
अघिल्लो साता सचिन तेन्दुल्करको नाममा रहेको ४९ शतकको कीर्तिमान बराबरी गरेका कोहलीले हिजो ५० शतकको नयाँ कीर्तिमान बनाएका हुन् । बुधबार कोहलीसँगै श्रेयस ऐयरले पनि शतक प्रहार गरे । बलिङमा न्युजिल्यान्डका टिम साउथीले ३ विकेट लिए । जवाफमा ३ सय ९८ रनको विशाल लक्ष्य पछ्याएको न्युजिल्यान्ड ४८ ओभर ५ बलमा ३ सय २७ रनमा अलआउट भयो ।
न्युजिल्यान्डका ड्यारेल मिचेलले १ सय ३४ रन तथा कप्तान केन विलियमसनले ६९ रन जोडेपनि टोलीलाई जिताउन सकेनन् । बलिङतर्फ भारतका मोहमद सामीले ७ विकेट लिए । भारत सन् २०११ पछि पहिलोपटक क्रिकेट विश्वकपको फाइनलमा पुगेको हो ।
भारतले अब उपाधिका लागि अस्ट्रेलिया वा दक्षिण अफ्रिका मध्ये एक टिमसँग खेल्नेछ । दोस्रो सेमिफाइनलमा खेलमा आज दिउसो कोलकातामा अष्ट्रेलिया र दक्षिण अफ्रिका भिड्नेछन् ।
