सुनसरी : देवानगञ्ज गाउँपालिका–३ कप्तानगञ्ज क्षेत्रमा कर्फ्यु आदेश उल्लंघन गर्दै प्रदर्शन भएपछि स्थानीय प्रशासनले नेपाली सेना परिचालन गरेको छ। जिल्ला प्रशासन कार्यालयका अनुसार स्थिति नियन्त्रणमा लिन सुरक्षा व्यवस्था थप कडा बनाइएको छ। दुई पक्षबीच भएको झडपका क्रममा प्रहरीको गोली लागेर २४ वर्षीय ओमप्रकाश मेहताको मृत्यु भएपछि तनाव चर्किएको हो। घटनामा एक दर्जनभन्दा बढी व्यक्ति घाइते भएका छन्।
गृह मन्त्रालयले घटनाको सत्यतथ्य छानबिन गर्न सहसचिव भूपेन्द्र थापाको संयोजकत्वमा पाँच सदस्यीय समिति गठन गर्दै एक साताभित्र प्रतिवेदन बुझाउन निर्देशन दिएको छ। घटनाबारे छलफल गर्न सोमबार साँझ केन्द्रीय सुरक्षा समितिको बैठक पनि बोलाइएको छ। साउने सोमबारका अवसरमा ‘बोलबम’ यात्रालाई लिएर दुई पक्षबीच विवाद भएपछि झडप भएको प्रहरीले जनाएको छ। प्रशासनले हरिनगरा, भुटाहा, कप्तानगञ्ज, घुस्की र देवानगञ्ज बजार क्षेत्रमा अनिश्चितकालीन कर्फ्यु जारी गर्दै उल्लंघन गर्नेलाई जरिवाना तथा कैद सजाय हुन सक्ने चेतावनी दिएको छ।
