काठमाडौं । आगामी भदौ ५ गते प्रदर्शनमा आउने चलचित्र **‘मास्टर्नी’**को टिजर सार्वजनिक गरिएको छ। आयंका फिल्म्सको प्रस्तुतिमा बनेको यो चलचित्रले आमा–छोरीको भावनात्मक सम्बन्धसँगै क्राइम थ्रिलरको कथा प्रस्तुत गर्ने संकेत दिएको छ।
एक लासबाट सुरु हुने टिजरमा ‘छोरीको सुरक्षाभन्दा ठूलो अरू केही छैन’ भन्ने संवादले कथाको मुख्य भाव उजागर गर्छ। टिजरले आफ्नी छोरीको रक्षा गर्न एक आमाले कति टाढासम्म जान सक्छिन् भन्ने विषयलाई केन्द्रमा राखेको देखिन्छ।
चलचित्रमा प्रियंका कार्की जोशी, सिम्रन खड्का, प्रमोद अग्रहरी, ऋचा शर्मा, आर्यन सिग्देल, दिनेश काफ्ले र रक्षा थापालगायत कलाकारको अभिनय रहेको छ। सुवेन्दु घोषको निर्देशनमा बनेको फिल्मलाई प्रियंका कार्की जोशी, आयुष्मान जोशी, क्याबिनेट श्रेष्ठ र प्रनित कार्कीले संयुक्त रूपमा निर्माण गरेका हुन्।
चलचित्रको कथा प्रियंका कार्कीले लेखेकी हुन् भने पटकथा शान बस्नेतले तयार पारेका छन्। युवराज इन्दोरियाको छायांकन, राजा सिंह सिदुको सम्पादन तथा रोहित शाक्यको संगीत रहेको फिल्मको पोस्ट–प्रोडक्सन नेपाल र भारतमा भइरहेको छ। नेपालमा चलचित्रको वितरण आरआर फिल्म्सले गर्नेछ।
