काठमाडौं । २१ वर्षअघि गुन्डा नाइके चक्रे मिलन (मिलन गुरुङ) को हात छिनालेको घटनामा दीपक मनाङे मंगलबार जेल चलान भएका छन् । सर्वोच्च अदालतले उच्च अदालतले गरेको यसअघि फैसलालाई नै सदर गर्दै उनीमाथि ५ वर्ष जेल सजाय हुने ठहर गरेसँगै उनलाई मंगलबार बिहान प्रहरीले राजधानीको सानोभर्याङ क्षेत्रबाट पक्राउ गरेको थियो । पक्राउ परेसँगै काठमाडौँ जिल्ला अदालतमा पेस भएका उनी लगत्तै डिल्लीबजार कारागार चलान भएका हुन् ।
सर्वोच्च अदालतले कात्तिक २० गते मनाङे’ लाई ज्यान मार्ने उद्योग कसुरमा दोषी ठहर गर्यो। सोही दिनदेखि नै गुरूङले आफ्नो मोबाइल अफ गरे। काठमाडौंको सितापाइलास्थित कम्फर्ट हाउजिङमा आफन्तको घरमा लुकीलुकी बास बसेका थिए । खाना खाएर आराम गरिरहेका उनी साढे १० बजे त्यहाँबाट निस्कने तयारीमा थिए । सोही बेलामा घरको गेटमा ढकढकाएको आवाज सुनियो । ‘हामी प्रहरीको केन्द्रीय अनुसन्धान ब्यूरो (सीआईबी) को टोली हौँ,’ भनिएपछि घरकी महिलाले ढोका खोल्न रोक्ने प्रयास गरिन् । सीआईबीको टोलीले सर्च वारेन्ट देखाउँदै घरभित्र प्रवेश गर्यो ।
मनाङे सोफामा उपर खुट्टा राखेर आराम गर्दै थिए । प्रहरी टोलीलाई देखेपछि उनी झटपट खुट्टा झार्दै अगाडि आए र भने, “किन आएको ? म आफैं आइहाल्थे नि!” प्रहरीका अनुसार उनी यसो भने पनि केही समय ढिलो भएको भए मनाङे फरार हुन सक्थे । सर्वोच्च अदालतको फैसाले मनाङेलाई ५ वर्ष कैद तोकेको थियो र त्यसको आधारमा सीआईबी, काठमाडौं उपत्यका अपराध अनुसन्धान कार्यालय र जिल्ला प्रहरी परिसर काठमाडौंको टोलीले उनलाई पक्राउ गर्न परिचालन गरेका थिए ।
सर्वोच्चको आदेशपछि मनाङेले मोबाइल बन्द गरेर त्यसको लोकेशन झुक्याउन बाहिर पठाएका थिए, जसले प्रहरीलाई भ्रमित गरेको थियो । मनाङे यसअघि भुक्तान गरिसकेको सजाय कट्टा गरेर अब २ वर्ष ४ महिना १ दिन कारागारमा बस्नुपर्ने बताइएको छ ।
