भोजपुर । रामप्रसालराई गाउँपालिका-३ भुल्केले मौरीपालनमा प्रोत्साहन गर्ने उद्धेश्यले कृषकहरुलाई चार दिने व्यवसायीक तालिम दिएको छ । यस वर्ष मौरीपालनको लागि छनौटमा परेका वडा भित्रका ४० जना कृषकलाई आधुनिक घारमा आधुनिक तरिकाले मौरीपालनका विषयमा जानकारी दिएको वडाले जनाएको छ ।
साथै उनीहरुलाई मह उत्पादन तथा मौरीका घारहरु वृद्धिका बारेमा समेत जानकारी दिईएको रामप्रसादराई गाउँपालिका-३ भुल्केका वडाध्यक्ष रामु थापामगरले जानकारी दिनुभयो। उनीहरुलाई आवश्यक सामग्री समेत दिइएको उहाँको भनाइ छ । मौरीपालनमा लागेका कृषकलाई स्वरोजगारसंगै आर्थिक रुपमा आत्मानिर्भर बनाउने उद्धेश्यले तालिम सञ्चालन गरिएको वडाध्यक्ष थापामगरले बताउनुभयो ।
वडाध्यक्ष थापामगरले भन्नुभयो, ‘हाम्रो क्षेत्रमा मौरीको राम्रो सम्भावना छ, धेरै कृषकहरुले पराम्परागत रुपमा भएपनि मौरीपालन गर्दै आउनु भएको छ । उहाँहरुलाई थप पोत्साहन गर्न वडाले तालिम सञ्चालन गरेको हो ।’
