काठमाडौं ।ओमनको राजधानी मस्कटमा आयोजित आठौँ हिन्द महासागरीय सम्मेलनका क्रममा नेपालकी परराष्ट्रमन्त्री डा. आरजु राणा देउवा र कतारका विदेशराज्यमन्त्री सुल्तान बिन साद बिन सुल्तान अल मुराइखीबीच आइतबार शिष्टाचार भेटवार्ता भएको छ। उक्त भेटमा नेपाल-कतार सम्बन्ध, द्विपक्षीय सहयोग, पारस्परिक हितका विषयहरू तथा कतारमा नेपाली विद्यार्थीहरूका लागि छात्रवृत्ति अवसर र दक्ष प्राविधिक श्रमिकका सम्भावनाहरूबारे छलफल भएको थियो।
यस अवसरमा मन्त्री देउवाले हमास समूहको नियन्त्रणमा रहेका नेपाली युवा विपिन जोशीको सकुशल रिहाइका लागि कतार सरकारको विशेष पहलको आवश्यकता रहेको बताउँदै मन्त्री मुराइखीलाई सहयोगको लागि अनुरोध गरिन्। साथै, उनले इजरायल-हमास युद्धविरामका लागि कतारले निर्वाह गरिरहेको मध्यस्थकर्ताको भूमिकाको प्रशंसा गरिन्।
यसअघि पनि मन्त्री देउवाले कतारका विदेश राज्यमन्त्री डा. मोहम्मद बिन अब्दुलाजिज अल-खुलाइफीसँग फोनवार्ता गरी यही अनुरोध गरेकी थिइन्। खुलाइफी इजरायल सरकार र हमासबीचको शान्तिवार्ताका प्रमुख मध्यस्थकर्ता हुन्।
नेपाल सरकारले विपिन जोशीको रिहाइका लागि संयुक्त राष्ट्रसंघ, अन्तर्राष्ट्रिय तथा क्षेत्रीय मञ्चहरूमा निरन्तर कूटनीतिक पहल गरिरहेको छ। सन् २०२३ को अक्टोबरमा हमासले इजरायली भूमिमा आक्रमण गर्दै विपिनलाई अपहरण गरेको थियो, र त्यसपछि उनलाई छुटाउने प्रयास जारी छ।
