काठमाडौं । लुम्बिनी प्रदेशसभाको बैठकलाई सोमबार सम्बोधन गर्दै प्रधानमन्त्री केपी शर्मा ओलीले वर्तमान सरकार कुनै हालतमा नढल्ने दाबी गरेका छन्। नेपाली कांग्रेससँगको सहकार्यमा बनेको गठबन्धन सरकार बलियो रहेको उल्लेख गर्दै उनले स्थिरता कायम राख्ने प्रतिबद्धता व्यक्त गरे।
प्रधानमन्त्री ओलीले सत्ता हस्तान्तरणबारे पनि स्पष्ट धारणा राख्दै भने, “७ महिना भइसकेको छ, अबका १७ महिना मैले सरकार सञ्चालन गर्छु। त्यसपछि सहमतिअनुसार नेपाली कांग्रेसका सभापति शेरबहादुर देउवालाई प्रधानमन्त्रीको जिम्मेवारी हस्तान्तरण गर्छु।”
उनले विपक्षी शक्तिहरूलाई आफूलाई जबरजस्ती हटाउने प्रयास नगर्न आग्रह गर्दै ठट्ट्याउँदै भने, “म छिटो पाक्ने केरा जस्तो फलफूल होइन। औषधि हाले पनि असर गर्दैन।”
यस्तै, उनले सरकारको स्थायित्वप्रति थप आत्मविश्वास देखाउँदै भने, “१७ महिनासम्म तोप हाने पनि सरकार ढल्दैन। सरकार दुई-तिहाइको बलमा छ, त्यसैले कसैले चाहेर ढाल्न सक्दैन।”
प्रधानमन्त्री ओलीका यी अभिव्यक्तिहरूले नेपाली राजनीतिक वृत्तमा चर्चा पाउने निश्चित छ। अब हेर्न बाँकी छ, आगामी महिनाहरूमा राजनीतिक परिदृश्य कसरी अगाडि बढ्छ।
