काठमाडाैं : फागुन १४ गतेदेखि प्रदर्शनमा आउन लागेको फिल्म ‘फेरि रेशम फिलिली’ को ट्रेलर मंगलबार काठमाडौंमा आयोजित एक कार्यक्रममा सार्वजनिक गरिएको छ। ट्रेलरले फिल्मको कथावस्तु झल्काउँछ, जसमा एक युवकको अमेरिका जाने सपना, त्यसका लागि गर्ने संघर्ष र त्यसक्रममा आउने विभिन्न अवरोध देख्न सकिन्छ।
एक्सन, ड्रामा, कमेडी र मनोरञ्जनले भरिएको यो फिल्म दर्शकका लागि रोमाञ्चक बन्ने अनुमान गर्न सकिन्छ। फिल्ममा विनय श्रेष्ठ र सुपुष्पा भट्ट प्रमुख भूमिकामा छन्। साथै, कामेश्वर चौरासिया, नीर शाह, लक्ष्मी गिरी, प्रकाश घिमिरे, रविन्द्र झा, शिशिर बाङ्देल, महेश त्रिपाठी, मेक्सम गौडेल, एवन उप्रेती लगायतका कलाकारहरूको अभिनय रहेको छ।
फिल्मको निर्देशन निरोज महर्जन ले गरेका हुन् भने रौनकविक्रम कडेल निर्माता हुन्। कार्यकारी निर्माता सुरज बम ठकुरी र सह-निर्मातामा एनी थापा रहेका छन्। सुसन प्रजापति ले छायांकन र सुरेन्द्र पौडेल ले सम्पादन गरेका छन्।
सिनेमा आर्ट को प्रोडक्सन र भी-मोसन पिक्चर्स को सहकार्यमा निर्माण गरिएको फिल्मलाई काफिया फिल्मस् र कुवेर सिने डिस्ट्रिब्युसनले देशभर वितरण गर्नेछन्। महाशिवरात्रिको अवसर पारेर फिल्म देशभरका हलमा रिलिज गरिने भएको छ।
