काठमाडौं । नयाँ वर्षको शुभकामनासँगै पूर्वराजा ज्ञानेन्द्र शाहले तीनकुनेमा भएको हिंसात्मक घटनाले आफूलाई मर्माहत बनाएको बताएका छन्। आइतबार सार्वजनिक गरिएको भिडियो सन्देशमा उनले घटनाप्रति दुःख प्रकट गर्दै नागरिक स्वतन्त्रताको महत्त्वमा जोड दिए।
“नागरिक स्वतन्त्रता भन्दा ठूलो तन्त्र अरु हुन सक्दैन,” शाहको सन्देशमा उल्लेख छ। उनले प्रजातन्त्रको वास्तविक मर्म बुझ्न आग्रह गर्दै भने, “जहाँ जनता खुलेर बोल्न सक्छन्, त्यही ठाउँमा सत्यको आवाज जीवित रहन्छ।”
गत चैत १५ गते राजधानीको तीनकुने क्षेत्रमा राजसंस्थाको समर्थनमा गरिएको प्रदर्शनले हिंसात्मक मोड लिएको थियो। प्रदर्शनका क्रममा २ जनाको ज्यान गएको थियो भने आगजनी, तोडफोड र लुटपाट जस्ता घटनाले वातावरण तनावग्रस्त बनेको थियो।
पूर्वराजाले यस्ता घटनाहरूले सामाजिक सद्भावमा चोट पुर्याउने भन्दै सबै पक्षलाई संयमता अपनाउन आग्रह गरेका छन्। नयाँ वर्षको सन्देशमार्फत उनले मुलुकमा शान्ति, स्थायित्व र जनताको भावना सुन्ने संस्कारको आवश्यकतामाथि जोड दिएका छन्।
यो सन्देशले शाहका समर्थकहरूलाई ऊर्जा दिएको छ भने उनका आलोचकहरूलाई पनि सोच्न बाध्य पारेको देखिन्छ—राजसंस्थाबारे बहस फेरि तात्ने संकेत देखिन थालेको छ।
