ढाका। भारतसँगको एकदिवसीय क्रिकेट शृङ्खला बंगलादेशले जितेको छ । मिरपुरमा हिजो बुधबार भएको दोस्रो खेलमा भारतलाई ५ रनले हराउँदै बंगलादेशले एक खेल बाँकी छँदै शृङ्खला जितेको हो ।
बङ्गलादेशले दिएको दुई सय ७२ रनको लक्ष्य पछ्याएको भारतले निर्धारित ५० ओभरमा नौ विकेट गुमाएर दुई सय ६६ रनमात्र बनाउन सक्यो । भारतका लागि श्रेयस अय्यरले ८२, अक्षर पटेलले ५६ र रोहित शर्माले नटआउट ५१ रन बनाए । बलिङतर्फ बङ्गलादेशका इबादत होसैनले तीन विकेट लिए ।
यसअघि टस जितेर पहिले ब्याटिङ गरेको बङ्गलादेशले ५० ओभरमा सात विकेट गुमाएर दुई सय ७१ रन बनायो । बङ्गलादेशका लागि मेहदी हसनले १०० रन बनाए । यस्तै महमदुल्लाहले ७७ रन बनाए । बलिङतर्फ भारतका वाशिङ्टन सुन्दरले तीन विकेट लिए ।
पहिलो खेलमा एक विकेटले विजयी भएको बङ्गलादेशले एक खेलअघि नै शृङ्खला जितेको हो । तेस्रो तथा अन्तिम खेल आउँदो शनिवार हुनेछ ।