काठमाडौं : राष्ट्रिय स्वतन्त्र पार्टी (रास्वपा) का सभापति रवि लामिछानेमाथि पर्सा जिल्ला अदालतमा पनि ठगीको मुद्दा दर्ता गरिएको छ। वीरगन्जस्थित सानो पाइला बचत तथा ऋण सहकारी संस्थामा देखिएको आर्थिक हिनामिनाको घटनामा उनलाई प्रतिवादी बनाउँदै गत शुक्रबार सहकारी ठगी र संगठित अपराधसम्बन्धी मुद्दा दर्ता गरिएको हो।
पर्सा जिल्ला अदालतका सूचना अधिकारी राम नरेश महतोका अनुसार लामिछानेमाथि ११ करोड ५६ लाख ९४ हजार रुपैयाँ बिगो माग गरिएको छ। यो प्रकरणमा उनलाईसहित २९ जना अन्यलाई समेत प्रतिवादी बनाइएको छ।
प्रहरी अनुसन्धान अनुसार वीरगन्जको उक्त सहकारी संस्थाले ५,८७३ जना बचतकर्ताबाट जम्मा गरिएको २ अर्ब ३० करोड रुपैयाँभन्दा बढी रकम अपचलन गरेको छ। सोही आधारमा जिल्ला सरकारी वकिल कार्यालयले मुद्दा अगाडि सारेको हो।
यस्तै, यही घटनासँग सम्बन्धित अर्का व्यक्ति छविलाल जोशीमाथि पनि ७ करोड २० लाख रुपैयाँभन्दा बढी बिगो मागदाबी सहित मुद्दा दर्ता गरिएको छ। लामिछाने र जोशी दुवै हाल बुटवलको सुप्रिम सहकारी काण्डमा ठगी र संगठित अपराधको अभियोगमा थुनामा छन्। देशका विभिन्न सहकारी काण्डमा जोडिएका यी घटनाहरूले लामिछानेको भूमिकाप्रति गम्भीर प्रश्न उठ्न थालेको छ।
