काठमाडौं। काठमाडौं महानगरपालिका प्रहरी प्रमुख राजुनाथ पाण्डेमाथि भएको निलम्बनको कारबाही उच्च अदालत पाटनले खारेज गरेको छ। अदालतको आदेशसँगै अब पाण्डे पुनः आफ्नो पदमा फर्किन पाउने भएका छन्।
बिहीबार उच्च अदालत पाटनका न्यायाधीश ऋषिराज भण्डारी र डिल्लीरत्न श्रेष्ठको संयुक्त इजलासले पाण्डेले दायर गरेको रिटमा उत्प्रेषणको आदेश दिएको हो। अदालतले निलम्बनको निर्णय उचित आधारमा नभएको ठहर गरेको छ।
गत चैत २१ गते महानगरपालिकाको कार्यालय प्रवेशमा रोक लगाएको भन्दै प्रमुख प्रशासकीय अधिकृत सरोज गुरागाईंले जेठ ६ गते पाण्डेसँग ७ बुँदे स्पष्टीकरण मागेका थिए। तर, स्पष्टीकरण सन्तोषजनक नभएको भन्दै गुरागाईंले जेठ २० गते पाण्डेलाई ६ महिनाको लागि निलम्बन गरेका थिए।
महानगर प्रहरी ऐन, २०८० अनुसार महानगर प्रहरी प्रमुख प्रशासकीय अधिकृतको मातहत रहने व्यवस्था गरिएको छ। यही व्यवस्थालाई आधार मानेर गुरागाईंले निलम्बनको निर्णय गरेका थिए। तर, अदालतले केवल जाँचबुझ समिति गठन गर्दैमा निलम्बन गर्नु नपर्ने स्पष्ट पार्दै सो कारबाही अमान्य ठहर गरेको हो।
