काठमाडौं । गायिका अस्मिता अधिकारी र गायक महेश काफलेले अमेरिकामा सांगीतिक टूरको घोषणा गरेका छन् । अगस्टदेखि अक्टोबर महिनासम्म त्यहाँका २० सहरमा टूर हुने मंगलबार आयोजित प्रेसमिटमा जनाइयो ।
उनीहरूको यो भ्रमणको नाम ‘सोलफूल युएसए यात्रा’ राखिएको छ । कोलम्बस, ओहायो, मियामी, फ्लोरिडा, ब्रानफोर्ड, कनेक्टिकट, एसबर्न, भर्जिनिया, ल्यान्कास्टर, पेन्सिलभेनिया लगायतका २० भन्दा बढी अमेरिकी सहरमा टूर आयोजना हुने विवरणमा जनाइएको छ ।
‘ओनेस्ट रियल इस्टेट’द्वारा प्रस्तुत र ’थ्री ई इन्टरटेन्मेन्ट’ले टूर व्यवस्थापन गर्नेछन् । अमेरिकी सहरहरूमा यो गायन जोडीको माग राम्रो भएकाले टूर आयोजना गरिएको थ्री ई इन्टरटेन्मेन्टका नेपाल प्रतिनिधि अन्जान बुढाथोकीले बताए ।
महेश र अस्मिताले पनि आफूहरू टूरको लागि उत्साहित रहेको सुनाए । यी कलाकारहरू ‘लज्जावती झार’, ‘नाच फिरिरी’ र ‘लाइटरले बिडी सल्केको’ जस्ता गीतका लागि परिचित छन् ।
थ्रीईले यसअघि आनी छोइङ डोल्मा, अभया एण्ड द स्टिम इन्जिन्स, कालीप्रसाद बाँस्कोटा, इन्दिरा जोशी, प्रमोद खरेल र अञ्जु पन्तजस्ता चर्चित नेपाली कलाकारको अमेरिका टूर व्यवस्थापन गरिसकेको छ ।
