न्यूयोर्क, अमेरिका :नेपालका दुई चर्चित व्यक्तित्व ज्ञानेन्द्र शाही र कुलमान घिसिङलाई यस वर्षको ‘हामी नेपाली ग्लोबल हिरो अवार्ड २०२५’ प्रदान गरिने भएको छ। यो प्रतिष्ठित सम्मान आगामी जुलाई २७ तारिखका दिन अमेरिकाको न्यूयोर्क सहरमा एक विशेष कार्यक्रमका बीच प्रदान गरिनेछ, जसको आयोजना प्रवासी नेपालीहरूको संस्था ग्लोबल नेपालीले गर्दैछ।
ग्लोबल नेपालीले प्रत्येक वर्ष नेपाल तथा नेपाली समुदायका लागि उल्लेखनीय योगदान गर्ने व्यक्तिहरूलाई अन्तर्राष्ट्रिय स्तरमा सम्मान गर्दै आएको छ। यसपटक राष्ट्र निर्माण, पारदर्शिता प्रवर्द्धन, जनसेवा र ऊर्जा सुधारका क्षेत्रमा पुर्याएको अतुलनीय योगदानका लागि शाही र घिसिङलाई सम्मानित गर्ने निर्णय भएको हो।
कुलमान घिसिङ : ऊर्जा क्षेत्रका क्रान्तिकारी
नेपाल विद्युत प्राधिकरणका पूर्व कार्यकारी निर्देशक कुलमान घिसिङले नेपालको ऊर्जा क्षेत्रमा पुर्याएको योगदान सायद नेपाली जनताले कहिल्यै बिर्सन सक्दैनन्। लामो समयको लोडसेडिङ अन्त्य गरेर विद्युत आपूर्तिको गुणस्तरमा सुधार ल्याउन उनका प्रयासहरू निर्णायक रहे। उनको नेतृत्वमा ऊर्जा क्षेत्रमा पारदर्शिता, क्षमता अभिवृद्धि र जनउत्तरदायी व्यवस्था स्थापित भयो।
ज्ञानेन्द्र शाही : भ्रष्टाचारविरुद्धको जनआन्दोलनकर्ता
युवासंघर्ष र समाजसेवाको परिचय दिँदै आएका ज्ञानेन्द्र शाहीले नेपालमा भ्रष्टाचारविरुद्ध सशक्त आवाज उठाउँदै आएका छन्। सार्वजनिक संस्थानमा हुने दुरुपयोग, अनियमितता र गैरजिम्मेवारीप्रति आवाज उठाउने कार्यमा उनको भूमिका उल्लेखनीय मानिन्छ। उनले जनचेतना अभिवृद्धि गर्न, प्रशासनिक सुधारको पक्षमा बोल्न र सामाजिक न्यायका पक्षमा क्रियाशील रहँदै आएका छन्।
भव्य समारोह, उच्चस्तरीय सहभागिता
अवार्ड समारोह न्यूयोर्कको एक प्रमुख हलमा आयोजना हुनेछ, जहाँ अमेरिका, क्यानाडा, युरोप लगायत विभिन्न देशबाट आएका नेपाली डायस्पोरा तथा समाजसेवी, उद्यमी, कलाकार, राजनीतिक विश्लेषक लगायत विशिष्ट व्यक्तित्वहरूको उल्लेखनीय सहभागिता रहने अपेक्षा गरिएको छ।
ग्लोबल नेपालीले नेपाली पहिचानलाई अन्तर्राष्ट्रिय स्तरमा उजागर गर्न र उत्कृष्ट योगदान गर्ने नेपालीहरूलाई प्रेरणा स्वरूप सम्मान गर्दै आएको छ। संस्थाका अनुसार, यस प्रकारको सम्मानले विदेशमा रहेका नेपालीहरूलाई पनि आफ्नो जरा र राष्ट्रप्रतिको दायित्व सम्झाउने काम गर्नेछ। यो कार्यक्रम केवल पुरस्कार वितरणमा मात्र सीमित नहुने, बरु नेपालको विकास, प्रवासी नेपालीको भूमिका र सामाजिक उत्तरदायित्वबारे व्यापक छलफल तथा नेटवर्किङको अवसर पनि प्रदान गर्ने बताइएको छ।
