काठमाडौं । नेपाली संगीतकी चर्चित गायिका एलिना चौहानले अनुहारमा चोटपटक लागेको तस्वीर सार्वजनिक गरेकी छन्, जसले सामाजिक सञ्जालमा चर्चा सिर्जना गरेको छ। तस्वीरमा जुन ९, २०२४ मिति देखिन्छ। उनले तस्वीरसँगै लेखेकी छन्, “म हरेक कानुनी, सामाजिक र नैतिक बाटो अपनाएर न्यायको लागि अघि बढ्नेछु। किनभने म एक्लो भएपनि, सत्य मेरो साथमा छ।”
यो तस्वीर सार्वजनिक हुनुभन्दा केही घण्टा अघि एलिनाका पूर्वपति विष्णु सापकोटाले सामाजिक सञ्जालमार्फत एक विज्ञप्ति जारी गरेका थिए। उनले सम्बन्धविच्छेदपछि आफूलाई नियोजित रूपमा बदनाम गरिएको भन्दै नेपाल र अस्ट्रेलियामा कानुनी प्रक्रिया अघि बढाएको बताएका थिए। एलिनाको चोटग्रस्त तस्वीर त्यसैको प्रतिकृया स्वरूप आएको अनुमान गरिएको छ।
यसअघि विभिन्न अन्तर्वार्तामा एलिनाले पूर्वपतिबाट शारीरिक हिंसा भएको आरोप लगाउँदै आएकी थिइन्, तर त्यो आरोप पुष्टि गर्ने दृश्य प्रमाण भने पहिलो पटक सार्वजनिक गरेकी हुन्।
करीब ६ महिना अघि काठमाडौं जिल्ला अदालतमार्फत एलिना र विष्णु सापकोटाबीचको सम्बन्धविच्छेद कानुनी रूपमा टुंगिएको भए पनि उनीहरूबीचको विवाद अझै समाप्त भएको छैन। हालै सापकोटाले सार्वजनिक रूपमा “हामी कहिलेसम्म पीडाको शिकार हुनुपर्ने हो?” भन्ने प्रश्न उठाएका थिए। यी घटनाक्रमहरूले उनीहरूको व्यक्तिगत सम्बन्ध सार्वजनिक बहसको केन्द्रमा ल्याएको छ।
