काठमाडौं : अत्यधिक गर्मी र सिँचाइको समय परेकाले विद्युत् माग अत्यधिक बढेपछि नेपाल विद्युत् प्राधिकरणको चनौली वितरण केन्द्रले साउन ११ गते (भोलि) का लागि ६ घण्टा लोडसेडिङ गर्ने निर्णय गरेको छ।
लोडसेडिङ नारायणी-माडी, मेघौली–विजयनगर–शुक्रनगर, र जगतपुर–रामपुर फिडर क्षेत्रमा लागू हुने बताइएको छ।
प्राधिकरणका अनुसार हाल भरतपुरस्थित १३२/३३ केभी सबस्टेशनबाट आपूर्ति हुँदै आएको ३३ केभी डग कन्डक्टर तारमा ३०० एम्पिएरको मात्रै लोड सहन सक्ने क्षमता छ। तर हाल माग बढेर ४५० एम्पिएरसम्मको विद्युत प्रवाह हुँदा तारले लोड थेग्न नसकेपछि लोडसेडिङ गर्नुपरेको हो।
यो समस्याको दीर्घकालीन समाधानका लागि अघिल्लो आर्थिक वर्षदेखि नै बसेनी सबस्टेशनबाट वैकल्पिक ३३ केभी लाइन निर्माणको काम अघि बढाइएको जनाइएको छ। लाइन निर्माण सम्पन्न भएपछि हालको भार सन्तुलनमा सहयोग पुग्ने अनुमान गरिएको छ।
चनौली वितरण केन्द्रले उपभोक्तालाई पूर्वतयारी गर्न आग्रह गर्दै संयमता अपनाउन अनुरोध गरेको छ।
