काठमाडौं : चर्चित हास्यकलाकार सुलेमान शंकर ‘इकु’लाई गहिरो पारिवारिक पीडा परेको छ। उनकी धर्मपत्नी अञ्जना शंकरको साउन १० गते ४२ वर्षको उमेरमा निधन भएको हो।
चार वर्षदेखि मिर्गौला रोगसँग संघर्ष गर्दै आएकी अञ्जनाको स्वास्थ्य अचानक बिग्रिएपछि उनलाई ह्याम्स अस्पताल लगिएको थियो, जहाँ चिकित्सकले उनलाई मृत घोषणा गरेका थिए।
यद्यपि अञ्जनाको अन्त्येष्टि निधनको केही दिनपछि, शुक्रबार मात्र पशुपतिस्थित विद्युतीय शवदाहगृहमा गरियो। पारिवारिक स्रोतका अनुसार, दाहसंस्कार ढिलो हुनुको कारण उनका छोरा अमेरिकाबाट फर्किन समय लाग्नु हो।
दम्पतीका एक छोरा र एक छोरी छन्। अञ्जनाको निधनले कलाकार इकु मात्र होइन, सम्पूर्ण परिवारलाई शोकमा डुबाएको छ। कलाकार तथा शुभेच्छुकहरूले अञ्जनाको आत्माको चिर शान्तिको कामना गर्दै इकु र उनका परिवारप्रति समवेदना प्रकट गरेका छन्।
